Eptu party-ten sorkar sum harsatna avangin treasury khar ngai hial angin an sawi a, social media lamah pawh titi lian a tling a, hetihlai hian treasury officer-te erawhin sum pek chhuah an titawp lo a; dan pangngai angin kalpui a ni thu an sawi thung.
January 29, 2024 khan Leader of Opposition Lalchhandama Ralte chuan MNF pisa Hnam Rûnah sorkarin sum an puk thu leh ni 15 lai treasury a kal thei ta lo tih a sawi a, he a thu sawi hi social media lamah sawi zui a hlawhin, ram mipui titi a tling a; he thu kal zelah Congress thalaiin nimin khan thuchhuah siamin treasury chu khar a ngai chu lungchhiatthlak an tih thu thuchhuah siamin an puang ve bawk.
Treasury khar (stop payment) anga thu thang hi a dik lo niin Aizawl South leh North Treasury officer-te chuan an sawi thung a. Chanchinbu mi thenkhatin an kawmnaah Aizawl South Treasury officer chuan, “Social media-a khar anga thehdarh kan hmuh hian kan bangbo khawp mai, hei in hmuh ang hian khar a awm lo, bill pek chhuah reng a ni,” a ti.
“Finance department hotute atangin ‘payment stop rawh u’ tih thu dawn kan nei lo,” tiin a sawi a, ni khata sum an pek chhuah theih zat angte chu an pe chhuak reng tih a sawi a ni.
Aizawl North Treasury officer pawhin bill an pe chhuak reng thu a sawi a, “Bill pek chhuah tur chu a awm a, treasury khar nia awma thuthang chungchangah hian finance deparment hotuten min rawn bia a, mak kan ti tlang hle, hei khar chu a ni loh hi,” a ti.
Treasury officer-te chuan kum kalta lama bill tang nasa lutuk ang kha chu kum tharah chuan a awm tawh rih lo a, nikum lama bill tang tam zawk chu an clear vek tawh tih an sawi.
Aizawl North Treasury officer chuan ni khata sum pek chhuah theih zat bituksak an ni rih lo a, mamawhna awm apiangah bill an pe chhuak zel a, sum tam tham chinah erawh finance lam thu an ngaichang thin tih a sawi a ni.