Aizawl : Kolasib District Level Committee on Fire Prevention (DLCFP) chu an Chairman, District Bawrhsap John LT Sanga hovin niimin khan Kolasib DC Conference Hall-ah an thu khawm a. Kangmei ven kawnga hma lak dan tur hrang hrang an sawi ho.
Chairman John LT Sanga chuan thal laiin Mizoramah lo hal vanga kangmei chhuak leh in lama kangmei chhuak a tam thin tih sawiin, kangmei vanga chhiatna a thlen loh nan inven fimkhur leh kangmei laka fimkhur inzirtir nasat a tul hle tih a sawi a. Ram kangin nungcha leh thil tote suatin, boruak chhia nasa takin a siam chhuak a, mihring hriselna leh nunna thlengin a tuar thin tih sawiin, in lama kangmei chhuak vangin sum leh pai, bungrua leh mihring nunna thlengin chan a ni thin bawk tih a sawi a. Kangmei chhuak tur ven chu mi tin mawhphurhna a ni, a ti.
Kolasib DLCFP Member Secretary, Kolasib Forest Division-a Divisional Forest Officer (DFO) Margaret Lalramchhani hnen atangin kum hmasa lama hma lak dan report ngaihthlak a ni a. Kolasib Forest Division hnuaiah range 9 awmin, VC leh YMA te nen tang tlangin awareness campaign eng emaw zat buatsaih a ni a. District Level Fire Prevention Award 2023-ah Kolasib District chuan lawmman pathumna a dawng a. Kum 2022-2023 chhungin Kolasib District-ah ram hectare 102.26-a zau kangin, hectare 3 chu forest area a ni a; kum 2023-2024 chhungin hectare 87.02-a zau kangin, hectare 2.50 chu forest area a ni thung a; ram kang hi kum hmasa aiin a tlem a ni.
Kumina kangmei ven kawnga hma lakna tur hrang hrang zingah, “Thapui thawhin kangmei chhuak tur i veng ang u” tih thupui hmanga February ni 5 – 9, 2024 chhunga hman tur Fire Prevention Week 2024 hawnna chu February ni 5 chawhma dar 11-ah Parish Hall, Kolasib-ah buatsaih ni se, tih a ni a. He huna Khuallian tur hian Mizoram Legislative Assembly Deputy Speaker Lalfamkima, Kolasib bialtu MLA chu beisei a ni a. Hun hman dan tur kimchang ruahman chu Chairman leh Member Secretary te kutah dah a ni.
Kumin thal chhung hian Kolasib District chhunga kangmei venna lam inzirtirna (awareness campaign) uar zawka buatsaih leh tura ruahman niin, media kal tlanga thuchah tihchhuah, video clip siam, kohhran inkhawma thu puantir, vantlang tlangau hmanga inzirtirna puan leh zirlaite tana essay leh intihsiakna dang buatsaih te tum a ni.
Kangmei ven kawnga thawk tha khuate chawimawina ‘Village Level Fire Prevention Award 2024’ chu kumin pawh hian siam leh tum a ni a. State Level Committee-in lo hal theih hun chhung a bituk March ni 15 chu Kolasib District-ah pawh zawm tur niin, hmunphiah chingtute bik tan phalna la hmasain March ni 31 thleng lo hal phalsak theih an ni ang a. Kangmei chhuak palh thei ven nan silai kenga ram vah khapna District Magistrate atangin chhuah a ni bawk ang.