Australian Capital Territory (ACT) thuneitute chuan an khawpui, Canberra chhim lamah ram nasa tak a kan mek avangin nimin khan emergency a puang.
Canberra leh a chhehvel kang hi kum 20 dawn hnua ram kang an tawrh nasat ber a ni a, ram hectare 18,500 a kang tawh.
Ram kâng hian an chenna a hnaih zel avangin khawpui daia khawsate chuan inthiar chhuah an ngaih dawn leh dawn loh an ngaichang mek hlawm.
“ACT hian kum 2003 hnua a ram kang nasa tak a hmachhawn mek,” tiin Chief Minister Andrew Barr chuan nimin khan thuthar lakhawmtute a kawmnaah a sawi a. “Tun dinhmunah chuan ACT sorkar hian ram kang aia ngaih pawimawh a nei tawh rih lo,” a ti.
Territory lian lem lo tak, Sydney leh Melbourne khawpui inkara awm, Canberra-ah hian mihring 400,000 vel an cheng mek.
Kum 2003 khan Canberra dai hnaiah ram nasa takin a lo kang tawh a, mi 4 thiin mi dang 500 velin hliam an tuar a, chenna in 470 zet a kâng chhia.
Canberra leh a chhehvela ram kang mek hi khaw awm danin a pui nasa hle a. Barr chuan, “Khaw lum lam hi 40°C vel a ni a, thli chak tak a tleh reng bawk avangin kangmei hi thunun theih loh a nih mai a hlauhawm,” a ti.
Ram kâng mek zinga a nasa ber hi Tuggeranong chhim district lam, Canberra-a Parliament House atanga minute 20 vel kal emaw leka hla a ni.
Canberra daiah hian chawlhkar eng emwa zat ram a lo kang tawh a. Kar hmasa Ningani khan Canberra-a tumhmun chu mei khu nasa lutuk vangin khar a lo ni tawh a. A thelhtu, US kangthelh pawla mi 3 chu Canberra bul, Snowy Mountains region-a an thlawhna tla avangin an lo thi tawh.