Asian Cup khelh mekah nilai zan khan last 16 khelh zawh a ni a. Iran leh Japan in an khingpuite ve ve hnehin quarter-final an lut. Nilai zan hian Iran in harsa taka hnehna an chan laiin Japan chuan Bahrain lakah awlsam takin hnehna an chang ve thung.
Iran hian Abdullah bin Khalifa Stadium-ah Syria an hmachhawn a, goal thun hmasa zawkah tang mah se an hmahruaina an hum zo bik lova, hun pangngaih hnehna an chang thei lo. Iran tan hian Mehdi Taremi chuan minute 34-naah penalty atangin hmahruaina goal a thun a, he goal hmang hian hun rei tak chhung hma an hruai.
Team lian Iran lakah an hnufual reng Syria in an siphurh sut theihna hun remchang an nei a, penalty an hmu. Penalty hi Omar Khribin chuan minute 64-naah a pet goal a, an si phurh a sut. 1-1 a nih hnuin inkhel a hmuhnawm leh zual a, goal thun tumin an innawr tawn nasa hle. Minute 90+1-ah Iran hmahruaina goal thuntu Mehdi Taremi hnawhchhuah a ni a, hei vang hian Syria in chak theih beiseina sang zawk an nei. Syria hian tam zawk nihna an chhawr tangkai thei lova, goal an thun belh thei bik lo. 1-1 a an inhnehtawk vangin penalty shootout hmangin quarter-final lut tur zawk zawn chhunzawm a ni.
Penalty shoot-out ah hian Iran tana pettu mi pangain an pet goal vek a, Syria tana pettu pahnihna Fahad Youssef-a’n a thelh thung. Iran chuan 5-4 a hnehna changin quarer-final an lut zui ta a ni. Iran hian Japan an hmachhawn zui leh ang.
Iran laka fiahna hautak hmachhawn tur Japan hian last 16-a an khingpui Bahrain chu 3-1 in an hneh a. Japan tan hian Ritsu Doan, Takefusa Kubo leh Ayase Ueda ten goal an thun a. Bahrain goal neih chhun pawh hi Japan player Ayase Ueda-a’n an lama a tih-goal tho a ni.