Aizawl : Siamliana Hall, Mamit-ah nimin khan VDVK Level Advocacy Programme on PMVDY hnuaiah Mamit District Cooperative Department kaltlangin Mamit Hmarveng VDVK Society members te tan training buatsaih a ni a, District Cooperative Officer Lalthangfala’n a telpui.
District Cooperative Officer chuan India Prime Minister-in tribal mipui ten an thlai thar te hmang tangkaia sum chang leh thei an duanchhuah theih chu he scheme hian a tum a nih thu a sawi a. He scheme hnuaia hmalakna atan hian Cooperative Department chuan Mamit Hmarveng VDVK chu a thlang a, scheme hmang tangkaia, scheme in a tum tihlawhtling ngei turin kalkhawmte chu sawmin, taimakna leh rinawmna nena beih chu sawrkar duh dan a nih thu leh retheihna atanga khaichhuah an nih theihna atana taima taka training turin a chah.
Sawrkar thuchhuahin a tarlan danin Hmarveng Area Level Federation hi kum 2022 khan din a ni a, 2023 March ni 5 ah Cooperative Society-ah in register-in, an ni hian Self Health Group ( SHG) 12 an enkawl mek a. Tunah hian Dispo cup 150 ml an siamchhuak mek a, Plate leh Bowl siamna tur khawl bun tawh niin siam tura hmalak chhoh mek a ni bawk a ni.