January 22-a hawn a nih hnuah Ayodhya-a Ram Temple chu mi nuai 25 chuangin an tlawh tawh a, thawhlawm pawh Rs. vaibelchhe 11 chuang an thawh tawh niin temple trust chuan a sawi.
Vantlangin pathian an biak theih nan temple hawn atangin ni 11 a liam ta a, hetih chhung hian a kalten an thawh hi Rs. vaibelchhe 8 zet ni tawhin cheque leh online payment hmangin Rs. vaibelchhe 3.5 an dawng tawh bawk tih temple trust office in-charge Prakash Gupta chuan news agency PTI a hrilh.
Temple chhunga hmun thianghlim, Balak Ram lim leh Ram Lalla lim dahna pindan bikah a kalten thawhlawm an thawh theihna tur bawm pali hun a ni a. Heng bawmte hi ‘darshan path’ an tih, a kalten hmun thianghlim hmaa an tawngtaina tur hmun an panna kalkawngah hun a ni.
Heng bawm bakah hian digital hmanga thawhlawm thawh theihna siamin computerised counter 10 a awm a. Ram-a chibai buktuten hetah hian cheque leh online-in an thawh thei bawk.
Counter-te hi tlaiah khar thin a ni a, thawktu 14-ten bawma tlate leh online-a pete chu an chhiar thin a. A chhiartute hi bank hnathawk 11 leh temple trust-a thawk pathum an ni a. An pawisa chhiar lai zawng zawng hi CCTV-a vil reng an ni bawk.
India hmar lamah khaw vawt zualpui a reh dawn tan avangin Ayodhya chuan Ram Temple tlawhtu tam zawk an beisei mek a. Uttar Pradesh Chief Minister Yogi Adityanath chuan Thawhtanni khan state leh district-a hotu liante thutkhawmpuiin Shri Ram Janmabhoomi complex control room chu pathian be tur tam zawk an kalkhawm huna an him theihna tura ruahmanna a siampui.
“Khaw awm dan a ziaawm ang a, vawt zualpui pawh a reh ang a, Ayodhya-ah hian khualzin leh Ram-a be duh tam zawk an lo kal dawn a. Ram Lalla betute hi an zavaia nuam taka an awm theihna tur kan ngaihtuahsak dawn a ni,” a ti.
Ningani khan Civial Aviation Minister Jyotiraditya Scindia chuan Ayodhya leh India khawpui dang pariatte inkara chawl lova thlawhna a thlawhna tur a hawng tawh bawk a. SpiceJet airline chuan Darbhanga, Ahmedabad, Chennai, Jaipur, Patna, Delhi, Mumbai leh Bengaluru atanga Ayodhya thleng ding lova thlawhtir a kalpui tan a ni.
Hun rei tak nghah tawh, Lord Ram Lalla temple hi thla hmasa khan Prime Minister Narendra Modi leh milar leh sumdawng hausa tak takte hmuh laiin hawn a ni.
Acre 70-a zau cmplex-ah hian a thawh khat nan temple sak phawt a ni a, a thawh hnihna hi December, 2025-ah zawh hman beisei a ni.