Aizawl: Zirtawpni khan Mizo Hnam Runah MNF-in chhung inkhawm an nei a, hun hnihnaah K Laldawngliana, MLA chuan ZPM sorkar chu enchhin tiin party dangin an vote-pui nasa tih a sawi.
K Laldawngliana chuan, “Tuna ZPM sorkar hi Pathian remruatah pawm theuh ang u. Congress tel lo leh MNF tel lo sorkar tiin an inzuar a, Congress leh party dang atanga bang chuang si lo te, party hrang hrang khan enchhin tiin an vote pui nasa hle a ni tih kan hria. Kan lo enchhin zel dawn a, a la reilo em a, sawisel leh puhmawh vak hun a la ni lo,” a ti.
ZPM sorkar chu a tak taka kalphung thar a awm leh awm loh chu Assembly Session hmasa berah an la hmu dawn chauh tih sawiin K Laldawngliana chuan, “Hman ni assembly session-ah khan opposition leh ruling bial kan thliar lo vang an tih kha a lawmawm hle a, kan lo thlir zel ang a, kan tawngtaipui zel ang,” tiin, an insawi anga an awm loh erawh chuan an nawr nek mai dawn tih a sawi.
Tuirial bialtu MLA chuan ZPM sorkarin intodelh tura kalphung thar chu beiseina sang tak nen mipuiin an thlir tih sawiin, “Chief minister adviser an dah teuh maite hi kalphung thar tha zawk a ni nge, an tangkainate kan lo thlir zel dawn a, sorkar thar hi tha taka ke pen zel turin duhsakna ka hlan a ni,” a ti bawk.
MNF Adviser HB Lianmunga kaihhruai Hnam Run chhung inkhawmah hian MLA hlui Dr ZR Thiamsanga pawhin thu a sawi a ni.