Hmunphiah chingtute harsatnaa mawh la ngam lovah CM puh

Aizawl: Mizoram Pradesh Youth Congress Committee (MPYCC) President Laltawnliana’n hmunphiah chingtu kuthnathawktute harsatna tawhah mawhphurhna la ngam lovah Chief Minister Lalduhoma a puh.

Nimin khan MPYCC President Laltawnliana leh Senior Vice President Ngurdingpuia te chuan Vairengte leh a chhevel khua tlawhin, hmunphiah chingtute harsatna an enfiah a. Hmunphiah chinga kuthnathawka eizawngte nena an inkawmnaah Laltawnliana chuan, “Hmunphiah chingtu kuthnathawktute nasa taka an buai lai hian, Mizoram chief minister berin he thilah hian sorkarin thiam loh a nei lo, agent-te thiam loh a ni, kan tuar tlang a ni ber, a ti chu mawhphurhna la ngam lo chief minister a nihzia chiang takin a lantir a ni,” a ti.

MPYCC President chuan, hmunphiah chingtute hian a hralh theih loh chhan ni lo vin, an hralh theih dan tur hi hriat an mamawh tih sawiin, “‘Kan tuar tlang’ tih hi tuna Chief Minister leh MLA te, inthlan dawna in affidavit theh luhah pawh hausa tak takte leh hmunphiah chingtu mi harsa te tawrhna hi huang khata dah chi a ni lo va, inpalzutna a ni,” a ti.

Laltawnliana chuan, “Hmanni lawkah Chief Minister Lalduhoma’n thu thar thehdarhtute a kawm tumin hmunphiah chungchangah ‘kan lei ang’ tih a sawi a, a sawi hnu lawkah a leina tur Rs vbc 110 nen lam kan dah fel vek tawh thu a sawi a. RR Associates te hian fin kherek chhuahin lei lo mah se, hmunphiah chingtute hmunphiah thar chhuah hi sorkar hian a ranglama leisak thuai turin kan phut a ni,” a ti bawk.

MPYCC-in an tar lan danin, Kolasib district hi Mizorama hmunphiah thar nasa leh a huan siam nasa ber an ni a. A bikin Vairengte-ah an tam zual hle a, hmunphiah chingtu Association member chhungkaw 40 chuang an awm mek a ni. Tunah hian sorkar inrawlh miah lo turin hmunphiah leikhawmtute chuan an duh a, Silchar mihausa te pawhin RR Associates leh sorkar inrawlh lo turin an duh bawk.

Leave a Reply

error: Content is protected !!