Aizawl: Autonomous district council thuneihna chungchangah District Council & Minority Affairs changtu Minister C Lalsawivunga leh Lawngtlai West bialtu MLA C Ngunlianchunga te chu nimina Assembly budget session neihah House-ah an inhnial buai.
Hachhek bialtu MLA Robert Romawia Royte-in ‘tun hnai sorkar thar din hnuah autonomous district council (ADC) pathumte internal affairs (an chhungkaw rorel) chungchangah governor thupek ni lovin DCMA department a inrawlh em?’ tih a zawhna leh zawh belhna kal zelah Lawngtlai West bialtu MLA C Ngunlianchunga chuan DCMA department-in autonomous district council hnuaia hnathawk zingah ai-kal la an awm leh awm loh a zawh chu ADC-te chu mahnia ro inrela thuneihna hran nei an nih avangin Mizoram sorkar thuneihna piah lam a nih thu a sawi.
Hei hi chhangin DCMA Minister C Lalsawivung chuan ADC hnuaia hnathawkte zingah ai-kal an awm leh awm loh zawh mai a nih thu leh an rorelnaah an va inrawlh tihna a nih loh thua chhangin, ADC pathumte rorelnaah governor thupek ni lovin DCMA department a inrawlh hriat a nih loh thu a sawi a. Ai-kal la an awm leh awm loh chu kalphung thar sorkara chief minister-in ni 100 chhunga tih tur a duan zinga mi a nih anga zawt mai an nih thu leh an thuneihna chhuhsak tumna emaw, an rorelnaa inrawlh tumna lam emaw a nih loh thu a sawi.