Hnam Puanzar hal, Meghalaya a nih ring

Social media-a Delhi hmarthlang lama India Hnam Puanzar hal lai nia sawi thehdarh chu zir chian a nih hnuah a hmun chu Meghalaya nia hriat a nih avangin Meghalaya police-te chuan FIR an ziak lut.

Video thehdarh pakhatah India Hnam Puanzar hi khawlaiah hal a ni a, a hmun hi zir chian a nih hnuah India hmarchhak lam ngei tih hriat a ni a. Police-te chuan Shillong Sadar Police Station-ah thubuai an ziak lut ta a ni.

Video thehdarhah hian thu pakhat inziak, tualchhung tawng, “ILP, Hynniewtrep Army leh sipai pawl dang tu lakah mah kan kun dawn lo,” tih a lang tel a. Heta tang hian thil thlenna lai awm hi an chhui chhuak a ni.

Online page pakhata video an thehdarh tannaah chuan thu an dah tel (caption)-ah chuan, “Sorkarin kawng hrang hrang hmanga hnam tlem zawkte tihduhdahna leh nekchepna a kalpui hian tribal-te a tiral tan mek zel a. Heng inthliarna piah lamah hian tribal-te nuai bo tumna, Citizenship Amendment Act 2019 pawh a awm tawh a ni,” tih dah a ni.

“He video hmang hian Hynniewtrep hi salte state emaw, dan lova pemkhawmte awmna a ni lo tih lantir kan duh a. Heng mite hian nakin lawkah chuan min la awp dawn a. Ram neitu kan ni a, kan ram humhim tur hian kan thawk zel ang,” tiin an ziah chhunzawm bawk.

East Khasi Hills district SP Claudia Lyngwa chuan Meghalaya Police chuan he thil thleng hi an chian tawh thu leh thubuai an ziah luh tawh thu a sawi a. SP chuan he thil hi Meghalaya khawi emaw laia thleng a nih a rinawm thu leh thu ziak lang chu an state-a tawng a nih thu a sawi a, “Mahse, khawi lai taka mi nge tih erawh kan la hre thei lo,” a ti.

SP Claudia chuan cyber cell-in ngawrh takin an umzui a, hetianga Hnam Puanzar haltu hi an man chhuah dawn thu a sawi.

Leave a Reply

error: Content is protected !!