ZPM-in sorkar kal ta an beihna dawt sawi a lang zel – MNF

Aizawl: MNF party chuan thuchhuah siamin, ZPM hian campaign lai khan lalna leh thuneihna an duh luatah MNF sorkar chu a chhe thei ang berin an bei thin a. Engkim chhe vekah an puhin tunah MNF sorkar kal ta an beihnaa an dawt sawi a lang chhuak mek zel niin an sawi.

An thuchhuahah MNF chuan, ZPM chu an leader Lalduhoma ngeiin, Tv interview hrang hrangah leh mipui hmaah Mizoram sum dinhmun chhiat zia sawiin, GSDP pawh -9.6 a nih thu a sawi thin tih an sawi a. “Hmaichhanah mi thiamin a ‘sawi dik lo; tih an hrilh hnuah pawh aw ki sang tak hmangin a la sawi lui tlat zel a nih kha. Tichuan, nimin maia budget a pharhnaah thudik tak chu a lo lang ta,” an ti.

MNF chuan Lalduhoma ngeiin a dawt lo sawi thin chu a rawn inphawrh mualpho ta tih sawiin, “Nimina budget a pharhnaah finance minister a nihna angin kum 2022-2023 chhunga GSDP chu 10.14 a nih thu a rawn sawi leh ta a, kum 2023-2024-ah chuan 10.55 a nih rin a nih thu a sawi ta hial a ni,” an ti.

“Hetiang hi thil awmzia a nih chhoh zel tak avang hian ZPM-in kan ram kaihhruai hna an thawh mekah an inzawrhna ang lo takin kan ram tan beisei an sang lo hle mai a. A tuk lawka lang leh mai tura dawt sawi thin hi, kan chief minister leh a kaihhruai party hian sim tawh se MNF chuan a duhin a chah nghal bawk a ni,” an ti bawk.

Leave a Reply

error: Content is protected !!