Khuh damdawi ei vanga naupang 68 thihnaah mi 23 hrem

Uzbekistan court chuan khuh damdawi him lo kaihhnawiha naupang 68 zet thihnaah mi 23-te thiam loh chantirin lung in tang turin a hrem.

Mi 23-te hi chhiah awl ru, damdawi him tawk lo hralh, an tih tur ang ti lo, inthlahdah, thil lem ti leh thamna laa puhin thiam loh chantir an ni hlawm.

An tan hun tur hi a inang lo hlawm a, kum hnih atanga kum 20 inkar a ni.

Tashkent City Court-a thi zat sawi hi a hmaa sawi aiin a tam zawk bawk.

Thla ruk chhung thubuai ngaihtuahah hian a tirah chuan mi 65 thi anga sawi phawt a ni a, thla hmasa khan mi dang pathum telh belh an ni.

Khuh damdawi hnang chi hi India-a Marion Biotech-in an siam, Uzbekistan-a Quramax Medical-in an zawrh chhuah a ni.

A tang rei ber tur hi kum 20 niin Quramax Medical executive director Singh Raghvendra Pratar a ni.

Sorkar hotu sang ni thin, he damdawi lak luh a nih theih nana phalna petu pawh tang rei tur zingah a tel bawk niin Reuters news agency chuan a tar lang.

Nikum January khan World Health Organization (WHO) chuan Marion Biotech-in khuh damdawi a siam pahnihte chu Uzbekistani naupang 18 zetin an thihpui hnuah enchian ngai niin a sawi.

WHO chuan Ambronol leh Dok-1 Max-ah hian a ni tur aia tam thil a awm niin a sawi.

Marion Biotech chuan a tirah chuan hetianga puhna hi an pha a, WHO thil hmuh chhuah leh sawi chu an pawm lo tih an sawi.

India-a health ministry pawhin siam chhuah chhunzawm tawh rih lo turin a ti nghal a, Uttar Pradesh-a an company licence pawh food safety department chuan a tihtawp lailawksak bawk.

March thlaah siam chhuah phalna chu a tihtawpsak hlen zui bawk.

Court chuan naupang 68 chhungte hnenah hian zangnadawmna $80,000 theuh pek turin a ti.

Hetiang zat tho hi damdawi an ei avanga ramtuileilova awm phah naupang pali hnenah pawh pek turin a ti nghal bawk.

Leave a Reply

error: Content is protected !!