Rajya Sabha inthlanah Congress MLA-ten BJP an vote || Himachal-a Congress sorkar a nghing

Himachal Pradesh-a Rajya Sabha MP thlanah beisei loh taka BJP candidate a tlin hnuah Congress an talbuai mek a, an sorkar chu tlu mai theiin a awm.

Inthlanah hian Congress MLA paruk laiin an party candidate lo zawk hi an vote a, anmahni thlawktu thin independent pathumin BJP an vote zawk bawk a. Hei hian sorkar siam tur khawpin thlawptu an nei tha em tih zawhna a siam mek.

Nilaini chawhnuah khan chief minister derthawng tak ni mek, Sukhvinder Sukhu chuan bâng tur anga sawina chu a ni lo tih a sawi.

“Tute mahin bâng turin min la ti lo va, bânna ka la thehlut lo bawk. Kan tam zawk a ni tih kan fiah dawn a, kan hneh ang,” a ti a. Budget an pharh hmain BJP chuan an party tihphel tumin ‘titi an vawrh’ niin a sawi bawk.

“Kan party-ah khi siam an duh a. Congress MLA-te hi chhuaka anmahni zawm turin an duh a; mahse, Congress hi kan inpumkhat a ni,” a ti a. An MLA zingah an pawl lo lam vote an awm ngei thu leh engvang nge tih leh an lama pawh hnaih leh an tum thu a sawi bawk.

An party lo zawk an vote tih a chian hnuah BJP chuan rorelna ina member 68 awm theihnaah Congress chu buk an phut a, chak turin thlawptu member 35 neih a ngai.

Congress hian MLA 40 an nei a; mahse, lehlam vote-tute hi paih chuan 34 chiah an ni dawn a, sorkar turin thlawptu an nei ngah tawk lo tihna a ni dawn a. BJP hian 25 an nei a, independent-ten thlawp mah se sorkarna an siam phak dawn chuang lo va, tumah chak awm lohna a ni thei.

Congess chuan an rorelna state hloh thei dinhmunah an ding tih an hriat veleh ‘observer’ pathum – Karnataka Deputy Chief Minister DK Shivakumar, Haryana chief minister hlui Bhupinder Singh Hooda leh state-in-charge Rajeev Shukla te chu buaina awm ching fel turin an ti nghal.

An hruaitu hlun, Jairam Ramesh chuan anmahni lo lam vote an awm chu ‘vanduaithlak’ a nih thu a sawi a, hetiang titu mi parukte chu an nihna paihsak theih an ni a. Tuna an tum ber erawh ‘Congress sorkar chhanhim’ a nih thu a sawi a. Thil thleng chu BJP-in an sorkar lote paih thlak tuma an beihna, ‘Operation Lotus’ dang an tawng niin a sawi bawk.

Chief Minister Sukhu-a chuan bân a tum thu sawi lo mah se Ramesh-a sawi hmangah thlak a ni mai thei a. “Thutlukna harsa tak pawh kan siam a ngai dawn a ni,” a ti.

Hetih lai hian BJP hruaitu, Rajya Sabha inthlana vote thlakthleng a awm hnua au ring ber, Jairam Thakur chuan Sukhu-a hi ‘ngaihtuahna fim chhe tê a la neih chuan’ bâng ngei turin a ti a. “Congress hi tam zawk an ni tawh lo,” a ti.

Thakur-a hian tuna anmahni vote-tu mai bakah hian ‘mi dangte pawh an lo la kal dawn’ tih sawiin pakua chu an lamah an tang tawh niin a sawi.

Hetiang boruak karah hian Nilaini chawhmaa assembly thutkhawmah speaker chuan BJP MLA 15 chu an au bengchhen nasat avang leh mawi lo taka an chet avangin a hnawt chhuak a. Tunah chuan rorelna inah hian member 53 chauh an awm ta a, tam zawk ni turin thlawptu 27 neih a ngai a, Congress chu buk pawh ni se chak thei an ni chiang a. Hetih lai hian MLA 15-te hi suspend chauh an nih chuan member 68 an la ni reng dawn tho tihna a ni a, Congress hi tling lo thei an ni tho bawk.

Congress hian Himachal Pradesh-ah hian rorelna fawng an chelh an hloh leh a nih chuan inthlanpui lo awm mai tura an kaihhruaia eptu tangrual, INDIA tan a pawi thei dawn a. Lok Sabha inthlan lo awm turah hian Prime Minister Narendra Modi leh BJP hneh tum hle mah se an tan chet lak a harsa lehzual sawt dawn tihna a ni.

BJP MLA 15 hnawt chhuak

Himachal Pradesh assembly speaker chuan Nilainia thutkhawmah Congress MLA parukin an party candidate lo zawk an vote hnu leh sorkarin rintawk lohna a awm mek boruak karah BJP MLA 15 chu an au bengchhen nasat avang leh an awm dan a dik loh avangin a hnawt chhuak.

Speaker Kuldeep Singh Pathania hiuan MLA 15-te hi budget session tan lai velin an au bengchhen nasat em avangin a hnawt chhuak a ni.

BJP MLA hnawh chhuak takte hi Jairam Thakur, Vipin Singh Parmar, Randheer Sharma, Lokender Kumar, Vinod Kumar, Hans Raj, Janak Raj, Balbir Verma, Trilok Jamwal, Surender Shori, Deep Raj, Puran Thakur, Inder Singh Gandhi, Dileep Thakur, leh Inder Singh Gandhi te an ni.

Thakur-a hian a hmain hnawh chhuah an ni mai thei tih a sawi lawk tawh a. “Hahdam taka budget pass a nih theih nan Speaker Kuldeep Singh Pathania hian BJP MLA-te a suspend mai thei,” tiin thuthar lakhawmtute hnenah a sawi a ni.

BJP hi Thawhlehnia Himachal Pradesh-a Rajya Sabha bial khat chauh inthlanah hnehna changin an candidate Harsh Mahajan chuan Congress atanga ding, Abhishek Manu Singhvi a hneh a, hei hi Congress MLA parukin anmahni lo lam an vote vang a ni.

Thakur-a chuan Rajya Sabha inthlan result hian Congress sorkar chuan thlawptu a ngah tawk tawh lo tih a chiang nia sawiin Chief Minister Sukhu chu bâng turin a phut.

Minister Vikramaditya Singh a bang bawk a, hei hian Congress-ah khi a awm bawk.

Singh-a hi chief minister hlui, Virbhadra Singh-a fapa niin Shimla Rural bialtu a ni.

Himachal Pradesh BJP chuan Governor Shiv Pratap Shukla chu an state-a rorel lai party chhunga buainaah inrawlha thutlukna siam turin an ti.

Leave a Reply

error: Content is protected !!