Pakistan-ah pawisa nei lo ‘billionaire’ pung thut!

Rickshaw driver Mohammad Rasheed chuan a fanu inkhualtelemna tur bike lem leisak nan Rs. 300 lek pawh a kuma kum a khawl a ngai a; mahse, tun hnai lawk khan a bank account-ah Rs. tld 3 ($ mtd 22.5) ngawt mai a lo awm reng mai. Amah ang bawk hian mi dang, mi rethei tak takte pawh hetianga zan khat thil thua lo hausa ta thut thut hi Pakistan ramah tun lai hian an awm nual mai.

Kum 43 mi, Rasheed chuan, “Ka hriat tirh chuan ka thlan nghal bawrh bawrh,” a ti a. Ani hi Pakistan prime minister-in an rama dik lo taka hausate pawisa chhuhsaka a neitu dik tak hnena pek tuma hma a lakna kawnga hausa thar thut zinga mi a lo ni reng mai.

Federal Investigation Agency atangin phone-in an bia a, a tirah chuan Rasheed hian hre thiam lovin biruk a tum a; mahse, a chhungte leh thian thate fuihna nen, thuneitute chu thawhpui a tum ta zawk a ni.

Rasheed-a ang chi hi tun hnaiah an tam a, Pakistan-ah chuan an chanchinbuah hetiang lam hi an chhuah zing ta hle a. A taka rethei tak, bank account lama sum tak tak nei ta siin an ram a luah mek a ni ber mai.

Rasheed hi thuneitute nen an indawr hnuah engmah inrawlhna a nei lo tih hriat chian a ni tawh a. “Investigating agency-in min man mai ang tih hlauhna avangin khalh pawh ka inkhalh chhuak ngam lo hman a ni,” tiin a hnuah a sawi leh a. “Ka nupui phei chu hrehawm tiin a damloh phah hial a ni,” a ti bawk.

Sorkar chuan an rama mipui chanai ei rute dim a tum lo va, pawisa tam tak, dik lo taka kalte chu chhui chhuah a tum mek a. “Heng sumte hi ruk an ni,” a ti hmiah a. “Vantlang tana hman tur an ru a, mi retheite account-ah te an thawn a, a hnuah ram pawnah an suan chhuak leh a. He ramah hian ei ru thin tumah kan hmaih dawn lo,” tiin chhui chhuah a tum hle.

An prime minister-in a vaukhanna hi mi retheiin an tuar rih mek tih erawh a lang a. Rickshaw-pu ang bawk hian kawngsira ice cream zuartu, Mohammad Qadir pawh hausa thut zingah a tel a, hrehawm ti takin a awm phah a. “Bank-ah hian luh pawh ka la lut lo,” titu hi a hausa miau si a ni.

A account-ah Rs. tld 2.25 a lo awm reng a. Ani ang bawkin pisa pakhata thawk, Sarwat Zehra chuan a hriat miah lovin Rs. mtd 13 a lo nei reng bawk a, ani phei chu a hrehawm ti thisen sang a neih phah a, a buai hle.

Pakistan sorkar hian mi hausa, dik lo taka sum neite a vaukhan hnuah mi hausate hian mi retheite hnenah, an hriat lohvin an sum an thawn tawp a, tih zui zel dan tur an hria a ni phawt ang. Mahse, sorkar hian a chhui mek zel a ni.

Leave a Reply

error: Content is protected !!