PTS-ah environmental awareness

Aizawl : Environment, Forests & Climate Change Dept leh Police Training School, Thenzawl ten nimin khan PTS Conference Hall, Thenzawl ah environmental awareness campaign an nei.

He programme ah hian Principal, PTS Ruatsanga Ralte chuan inlawmna thu sawiin, Police te chu Mizoram hmun hrang hranga kan awmna hmun apiangah dan kalha chetna titlem tur leh dan bawhchhiate man chhuah kawngah kan thawhhlawk thei hle a ni” tiin, ramngaw leh nungcha dan lova tichereu thinte man chhuah kawngah pawh forest department nena tangdunin nasa takin hma an la thei tih a sawi a. Mizoram environment chhe mek venhim kawnga nasa zawka thawk turin police kalkawmte hnenah fuihna thu a a sawi a ni.

DFO, Thenzawl Lalbiakchama Chawngthu-in zirtirna a pe a. Mizoram chu green cover thatna state ni mah ila, ramngaw tha kan neih chhiat thu leh north east states pariat zingah pawh virgin forest/Very Dense Forest(VDF) nei chhe ber kan ni a. Heti chung hian ramngaw tikang nasa state kan ni reng bawk” a ti a. Hei hian kan ramah tui harsatna a thlen chho mek a ni” a ti.

Ramngaw a chereu nasat avang leh leivung paih dan diklo avangin kan luiah te siltation a nasa a, hei hian kan lui tuite a tih tlem bakah kan luite pawh hun reilote chhungin hydel power pawh siamchhuak thei lo dinhmunah a la chantir vek thei” DFO chuan a ti bawk.

Zirtirna petu dang Rongura Hrahsel pawhin ramngaw leh nungcha humhalh kawnga hriattur pawimawh te a sawi a. Environment humhalh chu mitin mawhphurhna a nih angin kalkhawmte thawhpuiah a sawm bawk a ni.

Leave a Reply

error: Content is protected !!