Mahindra & Mahindra Financial Service Ltd (MMFSL) atanga document lem hmanga car loan cheng vaibelchhe 150 tih chingpen thubuaiah Police ten man belh an nei zel a, Aizawl-a Lirthei dealer pathum man an ni.
Deputy Inspector General of Police (DIG) (CID) Lalhuliana Fanai hnen atanga thudawn danin, Police ten thubuai an chhuina kal zela mi 3 – Rafael Nissan dealer George S. Thoite, Salem Veng ; Aidu Motors (Renault) dealer Madhurjya Sharmah, Salem Veng leh National Business Enterprise (TATA) dealer Paul Zothanpuia John, Khatla te an man a, an ni hi Police te’n an la hreng mek a ni.
April ni 26,2024 khan Mizoram Police DGP nil Shukla chuan thuthar thehdarhtute kawmin, MMFSL atranga document lem hmanga inbumnaah cheng vaibelchhe 150 chuang sum tih chingpen a nih thu leh he pawikhawihnaa a bul tum tu man chhuah a nih thu hi a lo puang tawh a, sum tichingpen naah hian Aizawl lirthei dealer te an in hnamhnawih thute hi a lo puang tawh a ni.
He thubuaiah hian April 25, 2023 khan MMFSL Area Manager Jakir Hussain leh a thuralpui mi 10 te man an lo ni tawh a, he thubuai chhuitu Special Investigation Team (SIT)-in thubuai an chhuina kal zelah tunhnai khan MMFSL, Aizawla thawk hnam dang pakhat pawh man belh a ni tawh a, nimin khan car dealer pathum hi an man belh leh ta a ni.
Police hotute’n an sawi danin, sum tam tham tak tih chingpen thubuai hi an hmawr an la bawk dawn hnai rih loh a, car dealer te bakah car rental te an inhnamhnawih dan te uluk taka chhui zel a ni a, chhui ngai a tam a, mi dang man belh tur pawh an la awm zel rin a ni.