ZORO General Headquarters bultumin Zokhawthar, Vaphai khua leh Tengnopal District Manipur ah India Sorkarin Indo-Burma border hung a tum leh Free Movement Regime (FMR) hlih a tum duhloh lantir nan Peaceful Rally nimin khan neih a ni.
Vaphai khuaah hian VC kaihruaina in zing dar 7:00-ah hun hman a ni a, ZORO General Headquarters Vice President Rohmingthanga Kawlni leh YMA aiawh, VC aiawh leh MUP aiawh ten thu an sawi a ni. Vaphai khuaa hun hmannaah hian Vaphai leh khaw thenawm atangin mipui thahnem tak an pungkhawm a ni.
Nimin vek khan Manipur Tengnopal District-ah ZORO General Headquarters buatsaihin hman a ni a, Manipur a hmanna hi Kuki Inpi leh Kuki Students’ Organisation in an buaipui a ni. Tengnopal District-ah ramri hung duh lotu leh Free Movement Regime thiah duh lo mipui thahnem tak an pungkhawm a. Duhlohna placard te tarin, kawng an zawh bawk.
Niminah tho hian Lunglei ZORO Division Headquarters-ah pawh hman a ni bawk.
A hmanna lian tham Zokhawthar Burma Border-ah neih ni bawkin, he hun hi Michael Lalramsanga, President ZORO Thalaiin a kaihruai.
He hunah hian Zokhawthar leh a chhehvel khua mipui thahnem tak an pungkhawm a, Burma lam Khawmawi khua leh a chhehvel mipui thahnem takin an rawn tawiawm bawk a ni.
He huna thusawitu R. Sangkawia ZORO President chuan, “Vawiina ZORO in a buatsaih Border fencing leh Free Movement Regime (FMR) hlih duh loh lantirna a buatsaih hi pawl mal hmalakna mai a ni lova, hnam Issue tak tak a ni a, Zofa zawng zawng hmalakna a ni. UN Declaration on the rights of Indegenous Peoples 2007 Article ah chuan, ‘Tualto hnamte a bik takin khawvel sorkar ramri khamin a thendarh te chu an inkawlpawhin an intanpui anga a, Sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, sawiho theihna dikna chanvo an nei a ni. Ram roreltute chuan tualto hnam te nena inbe rawnin he dikna chanvo te hi tipuitling tuirn hma an la ang,’ a ti a. He dan pass a nih lai hian India chuan a duhlo lama vote a pe a, tunah erawh a kalh zawngin hmalak a tum hi kan hrethiam thei lova. Border fencing a tum leh FMR hlih a tum hi kan dodal zel dawn a ni.” a ti.
He huna thusawitu dang L. Ramdinliana Renthlei General Secretary ZORO chuan, “Zofate hi kan duh vang ni miah lovin ram bung thum-ah thendarh kan ni a, chhinglung chhuak, chhulkhatkual, thisen a inzawm kan ni a. Zofate thendarh kan nih tirh a kan rilru a cham reng chu insuihkhawm leha, rorelna pakhat hnuai awm a ni, kan beisei kan nghah mek laiin India Sorkar chuan ramri hung a tum a, zalen taka kan inkalpawhna FMR hlih a tum mek a ni. India Sorkar hmalakna hi ngawi rengin kan thlir liam mai dawn nge, na zawkin ke kan pen dawn. Zofate min thendarh tum tute hi kan nek let ve dawn lawm ni. Vawiina hian hnam thisenin min au ta a ni. India Sorkarin a thil tum hi a ti lui a nih chuan kan thiam angin kan chhang let ve ang. Ramri a hung lui a, FMR a hlip lui a nih chuan Zofate Independence min puansakah kan ngai dawn a ni,” a ti bawk.
Zokhawthar peaceful rally-ah hian Bialtu MLA Clement Lalhmingthanga, Lalmuanpuia Punte MLA, Sub-Headquarters YMA Champhai, Zokhawthar khawtlang hruaitu aiawh, Hualngo Peoles Organisation aiawh leh Political Party hrang hrang aiawh ten thu an sawi bawk a. Thusawitu hrang hrang hian hnam inpumkhatna thute, Border fencing leh FRM hlih an duh loh thute leh an dodal zel tur thute an sawi hlawm a ni.