Palian boxer tha ber Usyk

Pathianni zing khan Boxing-a palian huangah inhnek ngaihven hlawh tak a awm a; Tyson Fury leh Oleksandr Usyk ten palian huanga boxer ropui ber nih an inchuh. Kawnghren pali inchuhna inhnek hmuhnawm takah Ukranian boxer huaisen Usyk chuan split-decision hmangin hnehna an chang a, palian huanga kawnghren pali kawl kawp thei hmasa ber a ni.

Palian huangah tlawm nei lova kal tluang pahnih; palian huanga kawnghren awm zawng zawng kawltu pahnih ni bawk Tyson Fury leh Oleksandr Usyk te inhnek tur hian ngaihven a hlawh hle. Kawnghren hren mektu pahnih an ni satliah lova, hneh theitu la tawng lo ve ve an nih miau vangin an inhnek hian boruak a siam lian lo thei lo. Palian huangah kawnghren pali, WBC, WBA, WBO leh IBF te a awm hnuin tumahin kawnghren pali an la kawl kawp ngai lova, palian huangah undisputed champion an awm ngai lo. Palian huangah kawnghren pali a awm hnua undisputed champion hmasa ber zawnna a nih vangin khawvelin a ngaihven a, an inhnekna Riyad, Saudi Arabia lam boxing ngainatuten an thlir rawn thup.

Inhnek ngaihven hlawh tak hian palian zawk leh chak tura rinkai zawk Tyson Fury-a’n bul a tan tha thawkhat viau a, round khatna atangin boruak siam a tum nghal viau bawk. Pate zawk leh chak tura rinkai lo zawk ni bawk mah se Usyk-a’n boxing thiam bik a nihzia chiang zawkin a lantir a. Huaisen takin a khingpui a nawr char char. Tawlh zawkah tang zel chungin Fury hian ban sei zawk a nihna a chhawr tangkai a, a hnek let a hlauhawm thei hle. Round ruknaah chiang leh na zetin a khingpui Usyk a hnek fuh zawn a. Ukranian boxer a talbuai thui teuh hle.

Palian zawk lakah bul tan tha lo mah se Usyk hian a tawrhchhelzia leh a huaisenzia chiang zawkin a lantir. Inhnek a rei telh telha a khel tha tulh tulh. Round kuana tawp dawn lamah chiang zetin Fury a hnek fuh siah siah a, Fury a talbuai tak zet. Usyk-a’n inveng thei lo leka a hnek luhai lai hian referee Mark Nelson chuan Fury a chhan a, inhnek a titawp lai lawk. Referee in a count tawp lamah dar a ri zui nghal a, Fury hian vanneihthlak takin knockout a tlawm a pumpelh hlauh.

Round 9-naah tlawm teuh viau mah se Fury a insiamtha leh thuai a, tlu tawh em lovin round tawp ber thleng a ding tluan. Inhnek ngaihven hlawh tak chu hmuhnawm takin a tawp a, inhnek a tawp thlengin chak tur zawk rin thiam a har hle.

Inhnek hmuhnawm tak a tawp hnuin result puan chhunzawm a ni. Endiktu pahnihin Usyk hi point 115-112 leh 114-113 in an chak tir a. Endiktu pakhat erawh chuan Tyson Fury hi point 114-113 in a chak tir ve thung a. Oleksandr Usyk chuan split-decision in hnehna a chang a, palian huangah kawnghren pali kawl kawp thei hmasa ber leh awmchhun a ni ta a ni.

Palian huanga boxer tha bera ngaih Tyson Fury a hneh leh tak vangin kum 37 mi Oleksandr Usyk chu professional huangah tlawm nei lovin a kaltluang zel. Usyk hian inhnek vawi 22 hmachhawn tawhin a la chak vek a, boxing huangah a ropuina ram a zau deuh deuh zel. Usyk hian professional boxing a luhchilh hmain Olympic Gold Medal a lak tawh bakah Boxing World Championship leh European championship-ah Gold Medal a lo la tawh bawk. Professional boxing a luhchilh hnuin a ropui zui viau a, cruiserweight-ah kawnghren pali kawl khawmin, undisputed champion a lo ni tawh a. Palian huangah kawnghren pali kawl khawm lehin heavy weight undisputed champion a ni zui leh bawk.

Palian huangah pumraw te pawl ni mah se Usyk hian boxing thiamna ril nei a nih leh a huaisenna chhawr tangkaiin boxer tha ber a ni thei hial. Amah aia pumraw lian zawk hmachhawn thin mah se chak zawkah a tang zel a. Palian huanga boxer lar, kawnghren pathum ngawt kawl khawmtu Anthony Joshua a hneh zawn hnuin palian huangah a hmin a chher lian leh zual. Palian huanga boxer tha bera ngaih Tyson Fury a hneh leh tak hial bawk vangin boxer tha bik a ni tih khawvelin a hrechiang lehzual ta hle a ni.

Palian huanga kawnghren pali kawl kawp hmasa ber Usyk hian kawnghren pali a kawl kawp rei dawn lo niin a lang thung. Report thenkhatin an tarlan dan chuan Usyk hian IBF kawnghren chuhpuitu tur a hmachhawn lo va, Fury hmachhawn a thlan zawk vangin IBF kawnghren hi an hlihsak dawn. Chuti a nih chuan Usyk hian kawnghren a kawl mek pali atangin pakhat a chan thuai dawn tihna a ni.

Inhnek vawi 36 a hmachhawn tawh atanga a vawi khat nana tlawm Tyson Fury chuan Usyk lakah talbuai chang nei bawk mah se, a pumpuia chetha zawk niin, chak zawk tur a nih thu a sawi a. Endiktute thutlukna chu thutlukna dik lo tak a nih thu a sawi. Chak phu zawk ni chungin tlawm zawkah tang mah se, Usyk nen an contract ziahah inhnek nawn lehna tur a awm thu a sawi a. Tha zawka kirin, an inhnek nawn hunah hnehna a chang ngei tur thu a sawi. Usyk hmachhawn nawn leh tura a kir tur thu a sawi rual hian Fury hian inhnek chawlhsan a rilruk tel thu a thang zui nghal a. Usyk a hmachhawn nawn leh dawn nge, boxing a chawlhsan zawk dawn tih a chiang rih lo.

Fury-a’n rematch a sawi chungchang hi press conference-ah Usyk zawh a ni a. Undisputed champion thar Usyk chuan Fury hmachhawn turin thla kua ngawt a inbuatsaih a. Kum thar, a fate birthday leh naute thar an neih thlengin a lawm thei lo vek a. Thil dang zawng zawng dahthaa Fury nen an inhnek turah ngawt a insawrbing thu a sawi a. Tunah rih chuan boxing a ngaihtuah rih loh thu a sawi a. Fury hmachhawn nawn leh tura a inpeih reng thu erawh a zep tel hram tho thung. Boxer rorum Usyk hi a pa ngaiin chanchinbu mite hmaah a tap chhuak hial nghe nghe a ni.

  • Tunge Usyk

Boxer ropui hming sawi apianga sawi hmaih thiang tawh lo tur Oleksandr Usyk hi January 17, 1987 khan Ukraine-ah a piang a. Kum 15 a nih thlengin football a khel thin. Kum 2006 atangin boxing a khel tan a, bul tan tha viau mah se amateur huangah hian inhnek vawi 335 a hmachhawn atangin tlawm zawkah vawi 15 a tang. World champion leh Olympic champion a nih hnuin kum 2013 atanga khan professional boxing a luh chilh. Professional huangah hian inhnek vawi 22 hmachhawn tawhin a la chak vek a. Boxer ropui huangah a hming ziah lanin a awm ta a ni.

Leave a Reply

error: Content is protected !!