CCTV footage-ah a bialnu hlui kut a thlak lai hmuh a nih hnu-ah Sean ‘Diddy’ Combs-i’n ngaihdam a dil. Hei hi lemchanna maiah ngaiin, rapper lar 50 Cent-‘n a pawm lo, tih a sawi.
50 Cent chuan, “A ngaihdam dilna hian awmzia a nei dawn lo. Tu in nge maw thurawn lo pe reng reng le,” tiin zawhna a siam zui a, thu post hnuaiah comment tam takin tawmpuiin, video clip hi hmuh tur awm lo ta se, Diddy hian ngaihdam a dil ngai lovang, an ti.
He video hi 2016 a thil thleng niin, hotel hallway-a a bialnu hlui Cassandra ‘Cassie’ Ventura laka tharum thawhna a hlenchhuak hi tunhnai mai khan video a darh huk mai a, ngaihdam dil lo thei lo dinhmunah a inhlangkai ni ah mi tam takin an ngai.
Instagram kaltlangin rapper Diddy chuan, “Ka chet lai khan mi tenawm tak ka ni a, tunah pawh hian thil tenawm tak ka ti ngei tih ka pawm. Pathian zahngaihna leh khawngaihna ka dil. Pawi ka ti tak tak a ni.
“Nitin mai hian mi tha zawk leh fel zawk nih tumin rilru leh ngaihtuahna ka seng reng thin a ni,” a ti.
He video clip hi CNN-in tun kartir lam khan a tichhuak a, mi tam tak a barkhaih. Diddy chuan chhuanlam siam miah lovin a thiltih chungchangah mawhphurhna ala vek dawn, a ti bawk.