Nimin khan Zo Re-Unification Organisation (ZORO) chuan an Pisapui Treasury square-ah an dinchamphaphak vawi-36 na an lawm a, an lawmnaah hian zawlnei Mimi Lalhmachhuani’n hunserh a hmang a, R. Sangkawia President in a kaihruai a ni. He huna hian Lalmuanpuia Punte MLA & Vice President ZORO leh Michael Lalthanmawia Treasurer ZORO ten thu an sawi a. ZORO chhungkua an kal tha hle a ni.
Hunserh hmangtu Zawlnei Mimi Lalhmachhuani chuan, “ZORO chu hnam Issue a awm apianga rawn che chhuak chat chat tura Pathian ruat a ni a, ZORO hi Pathianin a tharin a ti chak zel dawn a ni. Kan hnam hian atul huna au ngam, atul huna tawng chhuak ngam a mamawh a ni. Kan ram leh hnam chhan tur hian kan harh thar a ngai, sum leh therhlo ringawta kan buaina hi sim a hun tawh a ni.” a ti.
ZORO rising day a thusawitu Lalmuanpuia Punte MLA chuan, “ZORO hian Independence kan sual ngai lova, khawvel hmun hrang hrang India, Bangladesh leh Myanmar a awm Zofate kan insuihkhawm a, rorelna pakhat hnuaia kan awm theih nan hma a la mai zawk a ni. UNO hian Indigenous People te hi a theihnghilh dawn lova, UNO hi a duh naah chuan a chak lutuk, a hunah chuan Indigenous people te hi min la khai chhuak ngei ngei dawn a ni,” a ti a.
Lalmuanpuia Punte MLA chuan, “Zofate tan hian Pathianin thil tum a nei sa a, he hnam hi Pathian vohbik kan ni a, Pathianin mal min sawm dawn a ni. Zofate hian Pathian kan au nasa a, kan chhehvel ring lo mite hnenah chanchin tha kan hrilh darh chhung chu Pathianin min pui zel dawn a ni. Sorkarin kan unau Bangladesh atanga rawn kal thar apiangte chu Chakma Autonomous District Council (CADC) area a dah vek tawh turin a ti a, hei hi hmalak mek zel a ni,” a ti bawk.