Hyundai in an electric SUV thar tur Inster thawm rawn neih tir tan

  • Ruata

Hyundai chuan an electric SUV thar tur, lirthei dang chhuak mek nghahchhana duan tur ni lo, a thar hlak, Inster hmangin thawm an rawn nei tan.

Tun tum chu India ram chhung chauh ni lo, khawvel huap lirthei chanchinthar lam han hawi ila. Hyundai hian an electric SUV thar tur hi a ‘teaser’ an rawn tichhuak a. La thup deuh siin itawm tak leh hmuh chakawm takin an rawn pholang tan tihna a ni ber a. Hyundai Inster hi SUV te chi huanga mi tur a ni a. Tun thla ni 27 hian chiang zawkin an rawn pholan leh beisei a ni.

Hyundai Inster hi South Korea-a Busan International Motor Show 2024-ah Hyundai chuan an rawn phochhuak dawn a. Busan International Motor Show 2024 hi tun thla ni 27 atanga July ni 7 thleng neih a ni dawn a. Hyundai Inster hi Hyundai electric khawl hmang lirthei, tam tak siamchhuah tura ruahman hmasak ber a ni dawn a. A company lo chhuahna ram, South Korea lamah an hralhchhuak phawt ang a, hemi zawhah hian Europe lamah an hralhchhuak leh ang a, India rama a lo luh dan tur erawh chiang zawka la ngaihchan a ngai dawn a ni.

A teaser atanga a lan danin design lamah chuan Inster lo chhuak tur hian Pixel lighting set up a nei dawn a. Hei hi an electric lirthei tha bera chhal Ioniq 5-ah pawh an hmantir a ni. A lan danah chuan Hyundai Casper pawh sei hret a ni deuh ber dawn a, Casper hi a design element hrang hrangah pawh Inster hian a ang viau dawn a ni.

A headlamp bial leh a LED DRL awm dan te hi Casper-a kan hmuh ang deuh chiah a ni dawn a. A charging port hi a hmalamah an dah dawn a ni. A electric khawl hman tur lam chu chiang takin sawi theih a la ni lo a. Hetihrual hian vawikhat charge full-in km 315 vel tlan thei tura ruahman a ni dawn a ni.

India rama a lo luh leh luh loh tur hi sawi a la awm lo a. Hetihrual hian Hyundai Motor India chuan India ramah hian an BEV (battery electric vehicles) lam chu nasa taka a huang zauh an tum a. Chennai-a an lirthei siamchhuahna hmun atan pawh cheng vbc 26,000 lai an ruahman a ni a. He sum hi a lirthei duan na tur leh siamna hmun tihchangtlunna bakah BEV model hrang hrang duan chhoh nan an hmang dawn a, hei hi EV lirthei model thar belh zelna tur leh, India ram ngeia a battery pack siamchhuah a nih theih nan hman an tum bawk a ni.

News report hmasa lamah chuan Hyundai hian electric hmang lirthei thar hlak, paltform thar diai nen Smart EV Project hnuaiah tihchhuah an tum tih thawm a lo awm tawh a. Ram pawna la hralhchhuah rih phawt tur pawh lo ni se a siamchhuah hna erawh India ramah an tih ngei beisei a ni.

Hetihrual hian Hyundai chuan an SUV lar Creta chu electric hmang, Creta EV tih hming pu a tihchhuah tumin ruahmanna an nei mek a. Hei hi nakum lamah chuan an phochhuah theih tawh beisei a ni bawk a. Hyundai Creta EV lo la chhuak tur hian India ramah chuan Maruti Suzuki eVX leh Tata Curv EV nen inel tura ngaih a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427