US Open 2024 khelh meka mipa lamah rin phak bakin inelna thlengtu US an chetha a, semi-final pakhat zawkah Frances Tiafoe leh Taylor Fritz te an intum dawn. Kum 2006 hnu lama a vawi khat nan American mipa in US Open final an khel ngei dawn tih a chiang nghal bawk.
Thawhlehzan reia quarter-final khelhah Frances Tiafoe chuan Grigor Dimitrov a hmachhawn a, beisei aia hmain hnehna a chang a, semi-final a lut. Entu mipui tan rawn hlawh tak Tiafoe hian Belgurian Dimitrov lakah bul a tan tha a, set khatnaah break a neih a chhawr tangkai a, game thum hloh chungin set a la. Set la hmasa zawka a tan vangin amah leh entu lam an phur viau a, Flushing Meadows-ah mipui au ri a ring hle.
Amah tan em emtu mipui thahnem tak lakah Tiafoe hian set lak nawn leh ngei tum mah se a hlawhtling zo lo. Set hnihnaah an inhnehtawk viau a, break nei thei an awm lo ve ve. Game an inlak chhawk zak zak hnuin tie-break khelh a ngai. Tie-break-ah hian tawnhriat ngah zawk Fritz a chungnung a, set a la let. Set khat ve ve an lak hnuin inkhel a hmuhnawm zui viau a, set thumnaah Tiafoe a khel tha leh viau. Tiafoe hian break a neih a chhawr tangkai a, game thum hloh chungin set a la zui leh.
2-1 a hma a hruai hnuin inrintawkna sang zawk leh phurna namen lo tak nen a inlan chhunzawm a, set linaah 4-1 zetin hma a hruai hman. A chak ngei dawn nia a lan laiin a khingpui Grigor Dimitrov hi hliam vangin a inhnukdawk a, semi-final lut zo lovin a puanthhuah a tel. A khingpui a inhnuhdawh tak vangin Frances Tiafoe hian 6-3 6-7 (5-7) 6-3 4-1 a hnehna changin semi-final a lut. Semi-final-ah a hnampui Taylor Fritz a hmachhawn zui leh ang.
Quarter-final hmuhnawm takah tualchhung tlangval Taylor Fritz chuan Grand Slam-ah a vawi khat nan champion tuma tan khawh Alexander Zverev a hmachhawn a, set khat hloh chungin hnehna a chang nawlh.
Fritz hian Zverev lakah bul a tan tha a, beisei lawk aiin an inhnehtawk. Set khatnaah break nei thei an awm lo va, tie-break khelh a ngai nghal pang. Tie-break ah Fritz a chungnung a, set la hmasa zawkah a tang. US Open final-ah lo vanduai tawh Zverev hian hnehna chan let ngei tumin tan a khawh a, set hnihnaah game thum chauh hloh chungin set a la let a, a phur zui viau nghe nghe. Set hnihna a hloh hnuin Fritz hian set thumnaa break pawimawh tak a nei a, set a lak belh. Set linaah pawh an inhnehtawk zui leh viau a, tie-break khelh a ngai zui leh. Tie-break ah tantu nei ngah zawk Fritz a chungnung zui leh a, play langsar Zverev lakah 7-6 (7-2) 3-6 6-4 7-6 (7-3) a hnehna changin semi-final a lut.
Semi-final a inhmachhawn tur Frances Tiafoe leh Taylor Fritz te hi vawi sarih an lo inhmachhawn tawh a, Fritz hian vawi ruk hnehna chang tawhin vawi khat chauh a tlawm a, an pahnih inkarah a chungnung rih viau. Kum 2016 khan Tiafoe hian hnehna a chang ve nawlh a, hemi hnua an inhmachhawn hnuhng parukah tlawm zawkah a tang ta ngat ngat thung. A hneh hleihtheih loh Fritz lakah hnehna chang nawlhin final luh ngei a tum ang.
US Open-ah hian mipa lamah US player ten chetthat an harsat rei viau tawh. US player zingah US Open-a champion hnuhnung ber chu kum 2003 champion Andy Roddick a ni. Andy Roddick hi kum 2006 khan final a lut leh naa a champion zo tawh lo. 2006-ah champion zo lo mah se US mipa zingah US Open final khel thei hnuhnung ber a ni tho thung. Taylor Fritz leh Frances Tiafoe te zinga pakhat zawk zawk hi American mipa zingah US Open final lut hnuhnung ber an ni dawn a, champion tumin tan an khawh zui viau ngei ang.