- K. Hmingthankaia
Upa Pawl Chanchinbua ziah awm tak a nih laiin, chhiartu zau zawk awm beiseiin helamah hian ka’n ti ta zawk a ni e. A thupui khi tam sawi tur ka hre lova, chumi hmain thuhma thui deuh hlek kan nei lawk ang e.
Thalai a leh thalai fing an awm. Thalai fing chuan Upa pawl chanchinbu a hmuhin, ‘ hei le, thil hlu ka hmu e’ tiin a bih chat thin a, a fin belh phah tulh tulh thin. Thalai a chuan, ‘ Upa-te thu leh hla mai mai’ tiin a hawisana, a at belh tual tual thin.
Mizo Upa Pawl chanchinbu thlakip chhuak, ‘ MUP Tlangau’ hi Mizo tawh phawt chuan lo chhiar ve thin teh u. Vawiina Mizote hi vawiin kan thlen theihna tura kan pi leh pu, kan nu leh pate thil lo tawn tawh chi hrang hrang leh, an thil lo tawrh ropui tak tak leh rapthlak tak takte ziahna, ‘AN TAWNHRIATTE’ huangah hian, ramhnuai leh ramhuai chanchinte, ram vah leh ramsa chanchinte, Inlam leh Lo lam nunphungte, thihna leh damnate, vanneihna leh vanduainate, hlauhawm leh hlimawmte, vawiin kan thlen theih nana mihring danglam bik leh kan tana mi pawimawh hmasate, hmun hran hran leh mi hran hranin ram buai laia an tawrh dan leh an tawn hrang hrang ngaihnawm tak tak leh lungchhiatthlak tak takte ziahna leh, vawiina nuam ti taka Mizo kan la nih zel theih dan kan history hnaivai hriat theihna bu a ni.
Zirlai leh thalai tan, ziakmi leh zir bing tante, upate lung tilengtu leh an lunglen hnemtu chanchinbu hi lo hmelhriat ve la, hmelhriat har i inti mah mah mai thei. Kei pawh, tlai khaw hnu, mahse, upa pawl nih ka la tlin hma daihin ka hmelhriat ve chauh a, ‘ ka chhiar ve hma khan eng thu tha zozai tak lo ziak tawh ang maw’ tiin, ka hmuh theih ang angte ka dapkhawm ta ruai zawk a ni. Upa lam chanchinbu a nih angin, a hawrawp a hraw a, a fiah bawk a, chhiar a nuama, chhiar chhung a rei lo. Mahse, a ziaktute hi upa tawh tak takte an nih avangin mual an liam zel a. Kan tana hriat tur thu tha leh pawimawh tak tak leh, thu ngaihnawm tak tak leh lunglenthlak tak tak an lo ziah tawhna bu-te chu Upa pawl office lam atangin i hmuh leh theih ka ring.
Kan pi leh pute khan damlo ‘ Thla koh’ an lo nei thin a. Tunlai hian ‘thla koh’ hi, ‘thla ai koh’ tia sawi an awm avangin, hei hi a dik lo e, ti an awm a, kei pawhin dik loin ka ring. Thla ‘ ai’ hi chu khaw dai hnai deuha mumal vak lo, mahse, thin thawng tak si-a ai vak vak thin ni khan an sawi thin tlat. Thla koh hi chu; mi a chhan hriat loha damlo a awm a, a rum a rum hian, ramhuaiin a thla a man a nih hi, koh a ngai a ni, an ti thin. Chuvangin, ‘ thla koh’ tih ringawt kan duh tawk lo a nih pawhin, ‘ thla rum koh’ pawh ti ta zawk ila a inawm deuh hmel.
Chu a thla chu ramhuaiin an manna hmun, ramhnuai khawimaw laiah a rum a rum thin a. Chu chu ram vak tu-in emaw a lo hriatin, khuaah haw vang vangin damlo bawihsawmtute chu a hrilh a, annin a ko turin pasaltha an tir thin. Pasaltha chuan ramhuaiho vau tlawm nan chuan thu eng eng emaw chhamin, a inhrosa chiam thin a, thing leh maute a fik thuai thuai thin a ni. Chu chu ramhuai chuan hlauvin, an thla man chu an chhuaha, thla rum pawh a reh ve nghal thin. Chu veleh pasaltha chuan thla neitu chu a hminga koin, ‘ Ti rawh le, i haw tawh ang’ tiin, a kal hmasaktira, mahse, damlo In an thlen hma chu tumah a be thiang lo a, a tawng vaih chuan ramhuai chuan thla chu an man leh mai thin. Khuma mu damlo chuan, ama thla leh a kotu pasaltha kawnga an lo haw chu a lo hre thei vek a, tawng miah lova inchhung an lo luh veleh a dam ta thin a ni.
Thla, thla koh tih vel hi keima hriat leh tawn a ni lova, a hriate sawidan ka sawichhawn a ni. Mahse, mak tih deuh ka nei a. Pasaltha khan, ramhuaiho vau tlawm nana a inhrosak vak vak leh, an hlauh theih dan tur ber ni-a ngaih a thu chham zingah khan, ” Kha, keimahni Manasea thlah kan ni ngai e, Manasea thlah kan ni e” an ti tel ziah khan ngaihtuah a ti thui khawp mai.
Khang hunlai khan, ziak leh chhiar thiam chu sawiloh,Mizo tih emaw, Kristian emaw, Bible emaw pawh an la hre awm si lova, engtia Jakoba, Isarela fapa Manasea thlah kan ni, an lo tih theih tlat mai chu le. Chu chu an pi leh pu atanga tawngka an lo chhawm zel a ni-awm bawk si kha a mak ka ti a ni. He thu hi Isarel hnam bo kan ni ti thinte hian tanfungah an hmanawm ka la hre lova, nge, mite hian an lo ziakin, an lo sawi fo tawh a, kei hian ka lo la hre ve lo zawk.
Engpawh nise, Isarel hnam, Manasea thlah pawh chu kan lo ni mai thei. Nimahsela, Manasea thlah Isarel hnam bo, mahse, Mizo ni tura Pathian min hruai bo kan ni tih hi i pawm tlang mai ang u hmiang.
Mizo ni loten Mizo nih chakin Mizo nih phet an tum laia, Pathianin Mizo a nihtir sa reng, Mizo nih loh lo tum tlat chu Pathian pawisawina a ni ngei ang. Mizo vun rawng pu-in, Mizo thisen neiin, Mizo rilru leh Mizo ngaihtuahna neiin, Mizo hming neiin, Mizo tawngin kan thi dawn tho tho a, Pathian siam tawh hi a tih danglam theih tawh loh. ” Hnam tin an awmzia ang tur zelin ka siama, an tan ramri te ka khamsaka” titu hmun kan thlen hunah hian, bak ang maiin hnam bik leh awmna tur bik nei lo hian kan lai zo vek mai ang tihte pawh a hlauhawm alawm maw le.