United chanchina team chhe ber kan ni hial mai thei – Amorim

Manchester United head coach Ruben Amorim chuan a team kaihhruai mek chu an club kum 147 chhunga ‘an chhiat ber lai’ a nih hial theih thu a sawi.

United hian Pathianni zan khan 3-1-in Brighton an hneh lo leh a, Premier League-a an muala an khelh hnuhnung panga an chak loh vawi lina a ni.

November thlaa Amorim-a’n Erik ten Hag a thlak hnuah league-ah vawi 11 inlanah point 11 chiah an hlawh chhuak.
United hi 13-naah awm mekin tlahniam thei dinhmun sang ber aiin point 10-in la sang mah se 10-na chu point sarih laiin an phak lo bawk.

“Premier League-a kan inlan hnuhnung vawi 10-ah vawi hnih chiah kan chak,” tiin Amorim chuan a sawi a.
“Manchester United tantu tan chu kan dinhmun chu han suangtuah ta ula, ka tan pawh han ngaihtuah teh u. Coach thar kan nei a, a hmaa mi aiin a chak lo tam zawk a, chu chu kei pawhin chiang takin ka hria a ni,” a ti.

“Manchester United chanchina team chhe ber kan ni hial mai thei a. Chanchinbuten in ziah duh chu ka hria a; mahse, chumi hre chung chuan ka sawi a, thlak turin kan bei ang. In ziah duh duh chu ziak rawh u,” a ti.

United hian Pathianni zan inkhelah hian hma takah goal chhuahin an sut leh a. Bruno Fernandes-a penalty chhuih luh chu insiam that nana hmang zui lovin an bet zui hle zawk.

Kaoru Mitoma hmanga mikhualin goal thunin goalkeeper Andre Onana tihsual lian tak avangin Georginio Rutter chuan Brighton goal thumna a thun leh a ni.

An dinhmun mek thlirin United coach thar hian Amorim a sawi uar lem lo niin a lang.

Tun ang hun (inkhel vawi 22 thleng)-ah hian United team 13 chiahin tun anga an point hmuh zat anga tlem hi an la hmu a. A hnuhnung ber chu 1989-90 season daih tawh kha a ni.

Pathianni zana an chak loh kha tun season-a an mualah an tlawm vawi rukna a ni tawh a, 1893-94 season hnua league-a vawi 12 an inlan thlenga an tlawm tam ber tum a ni.

Premier League-ah hian Old Trafford-a an inlan hnuhnung vawi ngaah goal an chhuah hmasa vek a, hetianga league-a an muala a zawna goal chhuah hmasak vawi nga an neih hnuhnung ber chu August leh October, 2023 inkar kha a ni.

United hian tun season-ah Premier League-ah vawi 22 inlan tawhin vawi 10 an tlawm tawh a, 1989-90 season-a Alex Ferguson-a kaihhruai lai hnuah vawi 10 an chak loh tlin ran ber tum a ni.

United hi vawi nga an tlahniam tawh a, a hnuhnung ber chu 1974 daih tawh kha a ni a. Tun season-ah hian an tlakhniam chu a rinawm chiah lo va; mahse, thla hmasa khan Amorim-a chuan ‘thil theih’ a nih thu a lo sawi tawh thung.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427