Aizawl: Local/village council inthlanna neih tura election model code of conduct (MCC) bawhchhiaa an puh chungchangah Aizawl West II bialtu MLA Lalnghinglova Hmar, Minister of State chuan a kalh loh thu a sawi.
Nimina ZPM pisa-a an party chhung inkhawmah thu sawiin Lalnghinglova Hmar chuan tun hnaia Aizawl West II bial huam chhunga ZPM local council candidate-te inhmuhkhawmna, Vaivakawn YMA Conference Centre-ah party mi a nih angin sawm a ni a, thu pawh a sawi ngei a. Mahse, a thusawi chuan MCC a kalh loh thu a sawi.
Mizoram sorkarin Aizawl West II bial tana a hmalak tawhnate a sawi tih sawiin Lalnghinglova Hmar chuan, “SASCI Part-III hnuaia Aizawl West Outlet Project, motor kawng siamna tur Mizoram sorkarin a ruahman fel tawh thu leh hemi atana sum pawh min pek tawh thu ka sawi a, administrative approval pawh hmuh vek tawh a ni. Tin, Vaivakawn Market sak thatna tur Mizoram sorkarin a ruahman fel vek tawh, January 7-a State Level Committe On SASCI-in local council inthlan a puan hmaa a pawm fel vek tawh a ni,” tiin, vantlang hmuh theih turin I&PR website-ah he mi ni vek tlai dar 5-ah dah chhuah vek a nih tawh thu a sawi.
“Heng thilte hi project thar a ni lo a, sorkar hmalak tawhna a lawmawm kan tih em vanga I&PR-te pawhin an tar chhuah tawh kan han sawi nawn ve leh mai a ni a. A lawmawm tehlul nen, mi thenkhat chuan State Election Commission-ah MCC bawhchhia tiin min hek ta a ni,” tiin Lalnghinglova Hmar chuan, MCC-in inthlan atana vote duh vanga hmalakna thar puan a rem tih loh hre reng chungin a thusawinaah pawh sorkar hmalakna thar tur sawi châkawm tak takte pawh a insum zawk tih a sawi a. Veng chhung leh bial chhung bakah Aizawl khawpui tan leh Mizoram tan pawha sorkar hmalak tawhna thu lawmawm vantlang hriata tarlan tawh, a sawi chhuah ve lehte pawh inhek nan an hmang duh ta mai chu, mipui lawmnaah hian party thenkhat an lawm ve lo nia a hriat thu a sawi bawk.