Aizawl: Home Minister K Sapdanga chuan dan lova kuhna tawlh rukna kawng ruk 29 a awm a, hengte hi sorkar hmasa atanga an rochun niin a sawi.
Thawhtanni khan ZPM chuan an party pisa-ah chhung inkhawm an nei a. He huna thusawitu. Home Minister K Sapdanga chuan kuhva dan lo anga tawlh ruk vengin police-te an thawk rim hle tih sawiin, “Tunah hian police duty-te helna kawng ruk 29 a awm a, heng kawng rukte hi sorkar hmasa atanga kan rochun a ni,” a ti.
Kawng tam takah chuan tlawmngai pawlte leh VC-ten sorkar venpuia tlaivara duty-te pawh an awm tih sawiin home minister chuan, “Hetih lai hian smuggling kuhva tawlh rute thurualpuia lo tanpui zawk VC-te an awm tih kan hria a. Heng VC-te avang hian VC inthlan hi kan nghakhlel em em a ni,” tiin, inthlan zawh lamah chuan kuhva tawlh ruk pawh hi a tlakhniam sawt a rin thu a sawi.
K Sapdanga chuan sorkarin halpuah leh halmawi khapna thupek bawhchhia thubuai 52 ziah luh niin, hei hian mi 60 a hmer tel a, court-in an chungthu a rel dawn tih sawiin, “Sorkar thupek zawm veng thahnem tak an awm laiin thupek bawhchhia veng tlem tê an awm a, veng khatah in nga vel atangin thahnemngai taka hal an awm a, sorkar hming tha tur duh loa a dodal zawnga che ve duh hrim hrim mi tlem tê an awm a ni,” tia sawiin, kuminah pawh hunpui laia halpuah leh halmawi hal hi khap Mizoram sorkar chuan a khap leh dawn a, January thla khan rel fel a nih tawh thu a sawi bawk.