AZL: MNF Sr Vice President Dr R Lalthangliana chuan MNF a sorkar leh chuan district council area-a an hnathawh dan tihdanglam ngei a ngai tih a hriat tawh thu a sawi.
Kum thar atana Siaha district MNF party office hawnna nimina neiha he hun hmanpuitu Dr R Lalthangliana chuan MNF-in Zoram a kaihhruai chhung khan tihfuh tawk lote a awm ngei tih sawiin, “A bikin district council area kan enkawl dan pawh hi duhthu a sam hauh lo tih kan pawm. Tunah chuan ngaihtuahna thar nen rilru tharin MNF a sorkar leh chuan kan hnathawh dan hi chu tihdanglam ngei a ngai tih hi kan hria. India Constitution hnuaia Sixth schedule hnuaia sorkarte autonomous district council hi en hniam emaw, ngaihthah chi emaw a ni lo tih hi kan hriat thar a ngai a ni,” tiin, state danga autonomous council neite hian an council dinhmun an ngaih pawimawh thu leh dinhmun sang taka an dah thin chu, tun hnaia hmarchhak state hrang hrang a tlawh naah hmuchhuak tharin, rilru thar a siam phah tih a sawi.