Centre for Environment and Social Justice (CESJ) chuan nimin khan Aizawl Press Club-ah thu thar thehdarhtute kawmin dan leh thupek kengkawhtute inthlahdah thin chu pawi an tih thu an sawi a. An zirchianna atangin Mizorama police station biakpawh theih mumal a awm loh thu an sawi.
CESJ General Secretary VL Thlamuanpuia chuan hmun kilkhawr zawka cheng harsatna tawkten an hnaivai police station/out post phone number tar lana an biakpawh theih loh thu report an dawn fo avangin Mizoram puma police station 54 awm biakpawh tumin ni eng emaw zah chhung an fiah hnuah pahnih chiah an bepawp thei tih a sawi.
VL Thlamuanpuia chuan police station biakpawh theihna atan hian station officer incharge (OC)-te personal phone number hman a nih thin thu leh OC-te transfer an nih hian station biakpawh theihna number tar lan thin chu update a ni ngai lo chu mipuite harsatna a nih thu sawiin, “Hetianga mi mal cell phone/personal contact no, police station biakpawhna tura hman hi thil kawngkal a ni lo va, thil zahthlak tak a ni zawk. Mipui hmuh theih tura official website-a phone no. tar lan ni si, phone theih si loh hi kan police-ten mawhphurhna an lak ngam loh vang a ni em tih hi kan zawhna a ni,” a ti.
Tun hnaiah khawtlang/veng duty-ten mi sual nia an ngaih leh rinhlelh an man thinte chunga an chet dan avangin Mizoram mipui thinurna cho chhuak tualthihna a thlen thin thu sawiin, VL Thlamuanpuia chuan, “Hei hi tunhma pawha thlenh fo thin tih kan hre tawh. Hei thil hian lawless society kan nihzia a tilang a. Dan kenkawh kawnga sorkar ve reng ruang, tlawmngai pawla a innghahzia a tichiang a, hei hian sorkar chu dan kenkawh kawngah a hlawhchham a ni tih a lantir nghal bawk,” tiin, The Mizoram Police Act, 2011 hnuaia ‘Chapter-VI Policing in Rural Areas and Village Police System’-in inkaihhruaina dan a siam leh kalpui dan tur a duana dan awmsa pakhat mah zawm a hlawh lo chu pawi an tih thu a sawi bawk.