Ui nena dawr nghah

  • K. Hmingthankaia

Ui hlau chi leh ui haw em emtu ka ni a, ui hi ka ten hle bawk. Chuvangin, Uicho chungchang pawh hi ka ziak hnem tawh hle. Bible-ah pawh hian ui hming lanna chu hmuhsitawm tak zelin a ni. Mahse, heti taka ui hlautu ka ni chung hian, thil mak ve tak pakhat chu, hmana sumdawnna lama kan hotupa ber chu, amah a fair loh lutuk avanga dawihzep lutukin inven nan ui hlauhawm pui pui 2/3 hi a kawl reng thin a. Chung ui ho chuan ka hmel an hmuh rual hian khum hnuai velah hian an biru chuk chuk tlat thin lawi si ani. Mak ve tak a ni.

Kolasiba kan awm laiin, Kolasib Sub-Division Administrator, Civil SDO Pu Lalhuthanga (L) MCS khan ui khuahkhirhna thupek a chhuah a, amah ngeiin silai nen khawlai a fang theuh theuh thin. Ama driver ui ngei pawh a kaphlum hmiah. Kolasib khawchhung kawng zauhna tur order a siam a, amah ngeiin chempui leh thirtiang nen khawlai a fang thin a, tuna Kolasib khawchhung kawng zau nuam tak lo ni ta thenkhat khu a hmalakna a ni. Khatiang mi chak, mahni order a taka bawhzui thin mi huaisen khan min liamsan hma lutuka a pawi ka ti hle a ni. Tunah te la dam nise, Mizoram hian engemaw tal chuan kan chhawr tangkai ngawt ang. Ex Minister Pu R. Lalzirliana U, Pu R. Lalruata (L) MCS, kei phei chuan mi zawng zawng chunga mi tha ka tih mai pawh khan, kan SDO(civil) a nih laiin, khawlaia ran chhuak vai turin min tira, driver nen, 1V grade pakhat leh police 2 ka hruai a. Ka thiante khan ar tla lai an man thei khawp mai a, tlailam hmeithai Ina len meuh chuan sehhmeh a tui duh khawp mai.

Ui nena dawr nghak thintute bakah, customer care lo lutuk leh, sumdawn leh eizawnna leh dawrkai zei lo lutuk ho leh, tih tak takna tel lo ho hrim hrim hian ka pawi sawi hran lo mah se, tun tum chu kan thaikawi mai mai teh ang.

Min dawrtute lo hmachhawn hmasa ber tura dawr hmalam leh kawngka bul vela, hlauhawm taka Ui lo melhtir khui thintute hian eng rilru nge an put ang aw..ka ti thin. Customer hip tam zawk nan nge, mi ngaihsan nih beisei vang nge, at vang nge chapo vang ni ang aw? Nge, an dawr chhunga thilte chu hralh tak tak pawh tum lem lovin, a ruka thil dang hlawk zawk tih nan an dawr chu an hmang thin zawk emaw ni dawn le? Hetiang mi ho hi an tam lo, mahse, ka hmu leh zeuh thin. Russia President Vladimir Putin pawhin, Germany Chancellor Merkel nena an inkawm tuma, a bula a ui a awmtir vangin Merkel hnenah khawvel hriatin ngaihdam a dil a nih kha.

Kum 2025 Jannuary thla khan Aizawl Bazar Bungkawna dawra ka lut chu, an ui lian deuh, Alsatian thlahpawlh hian min lo dawngsawng hmasa ber a, mi hnim kual dun dun a, a ke pahnih chu ka hnungah hlangin ading ang ur ur a, ka awm a nuam lo ngang mai a, ka duh ka lei zawh chuan, ‘ Engatinge ui nen dawr in nghah. A va tih tak tak thlak loh ve. Ui lian deuhin lo melh khui chungin tunge lo lut chak ang’ tiin ka hauva, an nui tha ringawt. Anmahni pawh khan he thu hi an lo hmuh chuan an inhre chiang viau ang.

Mi tu pawh hian dawr nghaktute hian kan lawmna leh tlangnelna tawk turin min lo uksak se kan ti theuh. Kan beisei anga min lo chiauau loh hi chuan kan vui ru deuh thin, zep tur a awm lo. Vai dawrkai kan tehkhin ru ziah thin a nih hi. Belhchian leh pan tlak, pan chakawm an awm ve teuh tawh lai hian, dawr te emaw, lian emaw, eng eizawnnaah pawh hian, a tlangpuithuin, vai dawrkai kan la tluk lo lutuk hlawm a ni. Min chhang tha duh lote, phur loh hmel zet leh, en pawh min en mang lo chunga zawitea min chhang thinte, phone en tlatte, an inleng be char charte, a man zat zawh hnua kan lei leh loh vanga thinrim ta maite hi ka tawng hnem tawh hle. Kei lah hi ka ngeiawm bawk a, dawrkai ho mizia leh an chet vel dan, an awm dan leh an tawngkamte hi ka lo chik ru tlat thin a. Ka mit tlung lo fe fe ka hmu fo mai.

Vawikhat chu Silipar lei turin ka chhuak a. Silipar hria an lo awm mang tawh lova, “Chapal maw” an ti deuh zel a. Keiin, ‘ Silipar pawh in hre nange? ‘ kan ti deuh kher lehnghal hlawm a. Silipar chu ke zungpui leh ke zungpui u inkara a hrui chehbeh, a hnung lam kak pahnih a chhuat rah chhana inbilh lut hi a ni. Hmanlai chuan Silipar hi ‘Vawthlep’ tiin Mizo chuan kan sawi phawt a. Chutah a sap hming, Slipper tih kan han hriat hnu chuan, kan ti Silipar ta em em zel a ni. Chumi hnuah tunlaia Chapal ang deuh, a kaihna awm, rawng eng ngei mai kha a lo chhuak leh a, Sandak vawthlep kan ti leh zaih mai a, Sandak chu a siamtu company hming a ni. Sandak bun pha kha chu kan induh larh thin. Chumi hnuah savun pheikhawk pum a lo chhuak leh a, Mangai pheikhawk kan lo ti leh hmak mai a. Mangai tih chu, vaitawngin chah,thil chah, tihna mai a ni a, dawrkaite khan mangai pheikhawk kha an lo mangai thin a ni. Mangai bun pha chin kha chu luck tak kan ni.

Tichuan, silipar ka lei tum chu zawrh pawh an lo zuar ngai tawh meuh lova. Tin, dawrkai ho min lo dawnsawn dan chu ka chik ru zel pah bawk a. Phone bih chunga min chhang an tam hle. Hmun pakhat, Dawrpui Sikul kawmthlang, power house panna kawng chhaklam pheikhawk zawrhna tlarah hian, nula la upa vak lo, phone lawm rual awm lek hian, phone khawih hauh lovin, kawng atanga ka hawi phei chu, hmel nelawm leh hlim sarh hian min lo auva,phur takin ka lut ta a. Silipar pawh chu a lo hria a. ” Tikhan dawr lo nghak rawh, kudam ami ka zuk la ange” tiin, kei, a vawikhat min hmuhna ni si kha, min ring takin a kal ta a. Mak ka ti hle. Tichuan, ka thil zawn ngei, silipar ka bu tawk chiah chu a rawn la ta. ‘ Engzat pawh chhiar rawh, ka lei ang. Silipar hria i nih bakah, phone i khawih miahloh vang leh, customer i deal thiam em vanga dawr che ka nih hi. Hetiang hian ti zel ang che’ ka ti a. Ani pawh a lawm hmel khawp mai.

Dawr kan kaina leh kan sumdawnna leh, ei kan zawnna theuh kawng tinrengah hian, tihtakzetna thinlung nena ti leh ti lo kar hi a hla em em a. Kan thinlung hi kan hmel leh kan chetziaah a lang vek a, chu chu midangte pawhin min lo chhiar thei vek thin a ni tih hi i hre reng ang u.Hetiang lam hi tunah kan sawi vek seng lovang. Malsawm tlaka hna thawk leh, rilru hrisel neite hi chu Pathianin mal a sawm ngei ngei thin tih erawh i hre reng ang u.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427