- George L. Ralte, Vaivakawn
Kan Mizo pi leh pu te atang tawh khan mizote hi meizial zu hnam kan lo ni daih tawh mai a,khang hun lai atang tawh khan meizial zuk hi duh lo awm thin mahse a tul tlat si a lo ni.
A chhan ni a lang chu kan pi leh pu te kha hlo ah te an han feh khan thosi leh rannung dang thenkhat khan ti buai thinin, khang hun lai leh tun thleng pawhin a ni ang chu meizial zuk hian eng nge maw chen chu a lo veng thin a ni.Amaherawh chu tunlai hi chuan hlo thlo thin hi khawpui lamah pawh hian an tam ve tan ta hle mai a, thalai a tam zawk erawh hi chu vawi khat mah la feh ngai reng reng lo an ni awm e.A eng pawh chu ni se, kan mi hmasa kan mizo pi leh pu ten an fehna lama in ven nan a meizial an lo zuk thin kha mitin mai hian tun thlengin mahni awmna hmun apiang ah in tih changkan nan te meizial changkang chi (Cigarette) thlengin zuk leh chah an lo uar ta tulh tulh mai a, meizial ah hian Nicotine a awm niin an sawi a, hei addict a ti awlsam niin an sawi bawk a ni.
Meizial zuk avang hian mizote hian natna chi hrang hrang kan vei nasat phah hle mai a, natna thenkhat kan hriat lar te phei hi chu kan mizo zing ah hian vei nasa an awm nual bawk a ni.Kan India ram chanchinbu hrang hrang zing a lar tak pakhatin hman deuh tawh a, a thai lan dan chuan Mizoram hi meizial zu ah chuan a sang fi lawr hle a,mipa leh hmeichhia ah State dang te Mizoram hian kan khum vek niin a thai lang a,(hei hi chu a rei deuh tawh a, a dang lam ve deuh tawh awm e),chuvangin kan Mizoram ah pawh hian natna enkawl dam hlei theih loh langsar tak pakhat vei an tam em emna chhan niin a lang.Meizial zuk chungchang ah hian kan Mizoram sawrkar te pawhin nasa takin hma a la thin a, puipunna ah te, damdawi in ah te, leh sawrkar Office ah te meizial zuk khawpna thu te a lo chhuah hial tawh thin a nih kha.Meizial zuk nghei hlen hi ta hi tunna chuan chhiar fe tham an awm ve tawh a rinawm.
Meizial zuk nghei hi a harsa lova mahse nghei hlen dawn erawh chuan thil harsa niin mahni ah kan tawrh ve deuh a ngai thin a ni.Meizial nghei lama mi thiam ni a an sawi Linda Hyder Ferry chuan a hmasa ber ah chuan eng vang in nge meizial i zuk chhan kha han in zawt la, i hun awl tih khah nan nge, i rilru hah chhawk nan nge, i lo tih than vang hrim hrim? I thian ten an tih vang nge? Heng zawhna te hi i chhan hun ah meizial zu kher lo a tih theih dan zawn tur a ni tiin a lo ziak bawk a ni.A dawt leh ah chuan i meizial zuk zat kha chhinchhiah la, kar khat ah eng zat nge i zuk hman? Pawisa eng zat nge i sen ral tih kha chhinchhiah la, khang i pawisa hman ral ai khan nang mah thil pawimawh lei nan leh in chhungkaw thil pawimawh lei nan hmang la a fuh zawk lo maw? I meizial zuk thin te kha lak mai theih ah dah lo la, hmun sang deuh ah emaw awm hmun leh ban phak mai ah dah loh tur a ni.
Meizial zuk lohna hmun siam la, eng emaw chen chu a pui thei ang che.Heng bak ah hian i rilru in meizial zu tawh lo ang ah in dah la, miin meizial zuk tur an pek dawn che pawhin hnar zel ang che.Heng zawng zawng bak ah hian i thian te nen a rualin nghei u la, chu chuan team work a siam ang a, phatsantu nih bik kha in hreh ang a, a tha khawp ang.Mi mal tum ruhna hi a tawp ah chuan a pawimawh ber a, chuvang chuan meizial nghei i tum khan i rilru kha siam fel hmasa phawt ang che.