- Lalhminghlua Nkb, Kulikawn
Mizo ten kût kan neih zinga ropui ber Chapchar Kût chu mipuiin kan hlut chho tial tial zela a lawmawm hle. Mahni hnam kût ngaihhlut nachang kan hria hi Mizo kan changkang zia tilang chiangtu a ni. Kan hnam hi kan fing tulh tulha kan kût zinga ropui ber Chapchar kût hi kan ngaihluin kan hlut zual zel dawn niin a lang. Thil lawmawm tak a ni.
Kum dang angin Kum 2025-ah pawh Chapchar Kût chu Mizoram hmun hrang hrangah ropui takin lawm a ni. Chapchar Kût hi hun eng emaw ti atang khan March thlaa Zirtawpni hmasa berah hman thin a ni a, hei hi a fuh viau mai. Tin, Mizoram chhung inkhawmpuia mipui punkhawmna lian ber ni thin KTP General Conference nen hian a hun hi inrual chang a awm leh zauh thin. KtP General Conference hi chu General Conference neih kum March thlaa Pathianni hmasa ber nanga neih a ni thin thung a, Chapchar Kût leh KtP General Conference hi innan fuh chang awm thin mahse an innang fuh ziah lo tih erawh kan hre tlâng theuh awm e.
Kumin Chapchar Kût zet chu engkim kha a fuh tlangpui niin a lang. Kût hlawhtlinna tura a buaipuitu; sawrkarna vawn fung chelhtute leh Art & Culture Department lamte an che tha tak zet zet a ni. Kût chawlhkar huam chhungah kar tan tir atanga kawng sira dawr chi hrang hrang an siamte kha a fuh hle mai, kha khan kut a tihluin a tiropui zual hle. Mipui min hip khawmtu pawimawh tak pakhat a ni. Mizo pawh kan khawsak a lo changkangin kan intodelh chho zel a, ei leh inah pawh kan hniang hnar zel, kawng sira zan khaw thim thleng thlenga riltam tana inhnangfakna tur ei tur zawrhna dawr a awm put maite kha thil tha tak a va ni em! Kum dangah chuan ei tur zuarte chauh ni lo, zan khaw thim hnu pawha inzuar thei turin dawr tin maite kha eng (electric) pek theih ni vek se a va duhawm em. Tin, Krismas leh Kumhlui vuakvetah mah mipui chet vel a awlsam nan lirthei kal theih lohna (no vehicle zone) te kan siam a, kan Mizo Kût pawimawh ber Chapchar kûtah pawh hian kût a lo hlawhtlin zuala a chhimtu mipui nunau kan lo zalen zawk theih nan ‘No vehicle zone’ te hi puan ve a tha khawp mai. Kum dangah hemi tur hian kan hotute khan ruahmana han siam thei ula a va tha dawn em!
Kum eng emaw ti lai deuh kha chuan Chapchar Kût hian ngaihhlut a hlawh tawk thin lo niin a lang. Kumin Chapchar Kût erawhin Mizo mipuite ngaihhlut a hlawh mup mup hle mai, a changkang leh a hawizau apiangin an ngaihlu thiam emaw tih mai turin Chapchar Kût chhimtu tam tak zingah mi nawlpuiin kan chung en Officer lian tak tak te, College leh University a zirtir hna thawkte an kat nuk mai. Sawrkar hna thawk tam tak zingah pawh thutna dawhsan lama thu tur ni miah lote pawh Chapchar Kût chhima an tu leh fate nena inhnuk kual hmuh tur an awm zut mai. An fakawm e.
Thil engpawh a hlawhtlin tak tak dawn chuan naupang lamin an hluta nuam an tih a ngai thin. Kumin Chapchar Kût hlawhtlinna pakhat chu naupangin nuam an ti em em maite kha niin a lang. Tin, a hlawhtlina tizual turin PC Girls ten Pawnto an rawn entirte kha an hmuhnawmin an thiam tak zet zet a ni. Khatianga tha taka an chanvo rawn tihlawhtling tur khan nasa taka inbuatsaih a ngai dawn a, zirlai naupang bakah kawng engkima kaihruaitu an zirtirtute inpekna an fakawm tak zet zet a ni. Kum dangah pawh khatianga zirlai chanvo pek zel kha zawngchhang zel chi niin a lang, a theih pheih chuan sawrkar school tlahniam zelte dawm kan nan Govt. School bikte hi Chapchar kutah hian a hmun laili chan tir thei thin se, chu chuan rah tha a chhuah mial mahna le. Zirna chuan School pawn lama hmasawnna pawh a huap vek si a.
Kan zaithiamten an zaithiam an la theihnnghilh lova, mipui min awi tleiin min thap tha hle mai. Anni tel lo hian kut hi a kalh a kim thei lo. Incheina lam thiam ten Mizo thawnthu neih denchhena cosplay an neite kha a hmuhnawmin a thuken a bengvar thlak hle. Tin, Aizawl chhunga YMA Branch hrang hrangten Cheraw Kanpui an kan mup mup maite khan kût a va ti ropui zual em! Aizawla dawr pakhat Zo-Thuam dawrte chuan Chapchar Kût pualin naupang mamawh tan Zo thuam thawmhnaw a thlawnin an sem an ti, an entawn tlak hle mai. Tennis Court bula Two wheeler taxi te chuan Kût pualin a thlawnin artui chhum hmin sa an sem bawk, a va Mizo zia em! Chapchar kût puala midang tana thil tha ti tam tak an awm, kan sawi seng lo a ni ber e.
Sawi hmaih hauh loh tur chu Chief Minister Thusawi mawlh kha a ni. Chapchar Kût hi kan hmang fova Mizoram Chief Minister hrang hrangte khan hetiang hunah hian Chapchar Kut puala thusawina hun an nei thin. Kumin 2025 Chapchar Kûta Chief Minister thusawi zet kha chu a ropuiin a sawi tha thlawt a ni. Chapchar kuta Chief Minister thusawi tawh zawng zawngah chuan vawiina kan CM thusawi kha a la ropui ber awm mang e a tih theih, a sawi tha hle mai. Mizo thu hlu leh ropui tak tak an zeh tel teuhna Hamleta lemchan Mizo tawnga an lehlina an lemchan tawngkau chheh ngaihthlak ang maiin vawiina CM thusawi kha nakin khuareia enlet leh ngaihthlak nawn a la hlawh fo ang. Kan CM khan tlemte han khak sual zauh nei mahse kha’ng a sawisual tlemte kha chuan a mark hmuh thatna tur a dal zo lo a tih theih ang. A hnuah amah kan Chief Minister ngei pawhin a thusawia tih sual palh a neih lai chu ama social media official page-ah puitling takin a rawn sawi leh nghe nghe a nih kha. Khatiang kha mipui tlingzia a ni.
Chapchar Kût 2025 tithlu zual em emtu chu kan chhehvel state; Assam leh Nagaland cultural troupe ten an hnam lam an rawn entir a, hmun laili ber kan chantir kha a va fuh em! Kum dangah pawh North East State mai ni lo India rama state dang dangte pawh an hnam lam leh zai rawn entir tur hian i sawm fo ang u. Chapchar Kût tiropui zual zel tur hian a neitu Mizo mipuiin kan hlut thiam bakah India mipuiin an rawn hriata min hlutpui hi a tul si a, chu chu a thleng tan ta mek a ni. India ram mai ni lo, foreign daih Fiji ram atanga an hnam lam an rawn entirte kha a va hlu em, Chapchar Kût a tiropui tak zet zet a ni. Mizo hnam a dam chhung chuan Mizote hian Chapchar Kût hi kan hmang zel dawn, chuvang chuan he Kût pawimawh tak hi a hlutna tizual tura State dang leh Foreign atanga khual duhawm kan chah luh chhunzawm zel hi a pawimawh em em a ni.
Hnam fing leh hnam changkang apiangin mahni hnam ziarang leh mahni hnam kûtte an ngaihlu thiam thin. Keini Mizote pawhin Chapchar kût kan ngai pawimawha kan ngaihhlu zel hian kan hnam kan changkan zia a tilang zel e. Engtik niah emaw chuan ni hnih khat mai ni lo, kar tluan tluana Kûtpui kan ura kan lawm mup mup hun hi a la thleng ngeiin a rinawm. Chu chu i beisei tlat ang u. Kan thalai rual changkang tak takte leh khawhawi zau tak tak ten mahni kût ngaihhlut nachang kan hre ta zel hi hmasawnna duhawm tak a ni.