Pakistan-a Balochistan-ah ralthuam kengten Thawhlehni khan mi 400 chuang phur rel beiin mi thahnem tak an hreng niin sipaiten an sawi.
Baloch Liberation Army (BLA)-in Quetta atanga Peshawar pana tlan Jaffar Express Train rel hi an bei.
Inlak hran tum pawl hian thuchhuah an siamah Sibi district-a rel an beihnaah a kawng an bomb phawt a, an luhchilh zui tih an sawi a. Rel hi an thuhnuaiah a awm niin an sawi bawk.
Nilaini tuk thleng khan hel 16 vel thah ni tawhin rela chuang mi 104 chhanchhuah an ni tawh niin tual chhung chanchinbuten an tar lang.
Chhanchhuah zinga 17 chuan hliam an tuar a, damdawi inah dan nghal an ni.
Helho hian thuneituten darkar 48 chhunga politics thila Baloch politician an mante an chhuah lo a nih chuan an mi hrente an that dawn niin an sawi.
Chhanchhuah hna hi la thawh mek zel a ni.
Balochistan sorkar thupuangtu chuan relah hian ‘inkahna nasa tak a thleng’ niin tual chhung chanchinbu, Dawn hnenah a sawi.
Police hotu sang pakhat chuan rel hi ‘tlangin a hual vel leiverh hma lawkah a ding’ tih AFP news agency a hrilh.
Sipai hotu lian chuan relah hian Quetta atangin sipai 100 chuang an chuang tih a sawi.
Pakistani thuneitute bakah UK leh US telin, khawthlang ram tam takin BLA hi firfiak pawla an chhal a ni.
Kum tam tak chhung indan sual tawh pawl hian beihna lian tak tak an lo thlen tawh thin a, police stations, rel kawng leh kawngpui liante an bitum deuh thin.
BLA chuan an mi hrente hi chhanchhuah tuma beihna an tawk a nih chuan ‘thil tha lo nasa zawk’ a thleng dawn tih an sawi.
Quetta-a rel thuneitu pakhat chuan naupang 11, hmeichhia 26 leh mipa 43 chuan rel hi chhuksanin rel station hnai ber, Panir an thleng tawh niin a sawi a. Heng mite hi Balochistan-a chengte niin an sawi.
Rela chuang chhungte chuan an chhungte chanchin ngaihvenin Quetta rel station-ah an awm khawm mek a. Thuneitute chuan rela chuangte hi tumah an la bepawp thei lo tih an sawi a. An dinna lai hi internet leh mobile network awm lohna lai a ni.
Balochistan hi Pakistan-a province lian ber leh ram leilung hausa ber a ni a; mahse, a hnufual ber an ni thung.