Aizawl District Congress Commitee (ADCC) kaihhruaiin nimin khan Congress MLA, C Ngunlianchunga thlavang hauhna leh assembly zahawmna humhimna atan Assembly House bulah an pungkhawm.
ADCC member-te hian Mizoram Assembly House tuala punkhawm an tum chu Mizoram Police-te chuan house thlen hmain an lo dang a, hun eng emaw chen an innawr a. An innawrna avang hian pungkhawm zingah hliam tenau tuar an awm.
He hunah hian MPCC General Secretary TT Zothansanga chuan thu sawiin, “Mizoram rorelna sanga ram humhimtu tura kan ngaih, chief minister-in a member-puite zah baksak lova thu a sawina avangin Zoram rorelna hmun zahawmna a tlahniam zel dawn,” tia sawiin, chief minister chu a member-puite chunga a rilru put hmangte an thlirin, tunah hian C Ngunlianchunga mai ni lo, eptu member-te thlavang hauh tura pungkhawm an nih thu a sawi.
Assembly-ah chief minister-in zawhna a chhan dan chungchangah an dam thei lo tih sawiin TT Zothansanga chuan, an punkhawm chhan chu LADC-ah V. Zirsanga chungchang zawhna avanga lo piang chhuak niin, a zawhna chhang mai loa a zawttu lam CM-in a bei let vak mai chu parliamentarian chet dan atan mawi an tih loh thu leh thleng tawh lo tura an duh thu sawiin, C Ngunlianchunga mai bakah house leh Zoram mipui hnenah ngaihdam dil an phut tih a sawi.
MPCC thupuangtu, Dr. Lallianchhunga pawhin thu sawiin, house chhunga C Ngunlianchunga zawhna pehhel taka chhan a tumnaa House Leader Lalduhoma tawgkam hman dengkhawng tak mai leh, sorkar tha chakna hmachhuana invauna rawngkai a chhakchhuak chu India ram chhung leh Commonwealth ram hrang hranga dan siamna in (legislature)-ah ‘unparliamentary language’ anga ngaih a nih thu a sawi a. ZPM hian house chhunga awm dan mawi leh dik hre turin research an lo la ti lo tih a chiang hle tih a sawi.