- Dr. JT Vanlalngheta
Tum khat chu social media-ah Kohhran pakhatin an kum tin chhut chhuah (annual report) zînga an tih lan ni ngeia ngaih, pho chhuahna hi ka lo hmu a. A thawh tam berin kum khata a thawh kha Rs 10, 04, 750/- a tling a, a fakawm khawp mai, Pathianin mal sâwm zel se kan duhpui hle mai.
Thawhlawm thawh zat, Kohhran annual report-a kohhranhote’n an ti lang thin hi chu a tha reng mai; kohhran pawisa kum a lo tawpa thawh zat hre lote tan leh tih sual palh awm leh awm loh te hriat nân a tha a ni. Pathian ram zau zêlna a tân a ni a, thawh tam zual chhûngkaw sâwmte pawh khan tan la zêl se; Pathian teh dan lam erawh chu mihringin kan va hre phak lo va. Thawh tam lam hi chu kan thawh bâk (a la bâng=balance) atanga chhûtin, Krista rilru dek che tham a nih leh nih loh chu a hriat chauh vang; hmeithai pakhatin dâr tangka dere pahnih a thawhin Isua hnên a thlen dan kha kan hre hlawm ang a (Lk 21.1-4). Thawhlâwm thawh sâng zînga a hmasa ber (topper) thawh kha Sawma Pakhat emaw, a aia tam emaw a lo nih erawh chuan Pathian hnên a thleng ngei ang tih erawh chu Bible atangin kan hre thei thung a (Mal.3.10).
Amaherawhchu, kohhranah hi chuan, mi lian leh mi tê, hausa leh rethei thliar hrang lova, Krista-ah mi zawng zawng inang tlang vek kan nih avangin, annual report-a thawh zat chhuah baka a thawh sang zualte han tih lan leh erawh hi chu Krista’n A kohhran A din dan kal phung nêna han hmeh bel thiam a harsa deuh va; mi harsa zawk Rs 1000 aia tlem, Rs 1000 aia tlem thawh te pawh awm theih a nih bakah, retheih vanga thawh lem lo thlengin a awm theih si a (kei pawhin hetiang hi ka hria). Thawh tam tûr nei ve lo, Isua nên an inzawm avang leh kohhran hlat hi mahni tan a tha lo tih hria a, inkiltawih leh ti dêk chunga rawn inkhâwm hrâm hrâmte tan chuan hmuh a nuam lem lo maithei; a thawh sâng zual top 10 tih ang chi hi chu tih lan aiin tih loh chu a kohhran zia zawkin a fhlanawm zâwk mai ang em tih ngaihtuah theih tak a ni; kum tina kohhranin (‘Kohhran’ common noun hi, kohhran sawi bîk, kohhran mal kan sawina a nih loh chuan ‘Kohhran’ tia ziah loh tûr) a member, Krista taksa pêng hrang hrangte thawh zât a tih lan hi chu chhunzawm zel a that laiin thawh sang zual tih lan kher erawh hi chu tih loh theih ni se, a thawh sâng zual hi chu mi nawlpui hian kan hre tho thin si a.