Aizawl: P&E Minister F Rodingliana chuan Tuirini Hydel Project pawmpuina an hmuh tawh thu a sawi a; sorkar hmasain kawlphetha chhit man a bat chu sorkar tharin a rul vek tawh niin house a hrilh.
Nilainia Assembly Budget Session-ah zawhna leh chhanna hunah zawhna neitu Aizawl South II bialtu MLA Lalchhuanthanga zawh belhna chhangin F Rodingliana chuan Departments of Economic Affairs (DEA) atangin Tuirini Hydel project pawmpuina an hmuh tawh thu sawiin, “A finance-tu tur pawhin an hre tawh a. He tuikhuah hi kan khuap thei a nih chuan Mizoram ta tur a ni,” a ti.
P&E minister chuan Tuirini HP finance-tu tur New Development Bank nen Delhi-ah an inhmuh tawh thu a sawiin, “Sorkar hmasa lamah an lo hnawl tawh avangin thar thawh leh a ni a, sorkar tharin policy-a kan dah dante kan hrilh a. Min phurpui thu pawh tawngkain kan hre tawh a. Kan tih theih pawh kan ring a. Hmalakna pawimawh niin, rei lo teah a chhanna phuisui zawk dawn kan inbeisei,” tiin, Tuirini HP hi megawatt 24 pe chhuak thei tur a nih thu leh DPR chu 2023-2024 niin Rs vbc 676.78 a nih thu a sawi.
Tuichang bialtu MLA W Chhuanawma zawh belhna chhangin P&E minister chuan sorkar hmasain êng chhit man ba Rs vbc 200 dawn a hnutchhiah chu tunah chuan a rul vek tawh a. Tun dinhmunah ba rulh that avangin Rs vbc 2.60 dawn an hmu let tawh tih a sawi.
F Rodingliana chuan an sorkar tirhin megawatt 12 pe chhuak thei Serlui B Hydel project chu thuam that tumin hma an lain, July 6, 2024 khan a zirchiangtu tur an tirh thu a sawi a. Tun dinhmuna harsatna lian tak an neih chu a penstock line a chhe tawhin, a plate a khawr tawh avangin cement block pawh a tichhe tawh a. Powerhouse lei hnuai lama awm a bang atangin tui a put nasat avangin mihring tan pawha hlauhawm a nih tawh thu a sawi a. Siam tha tur chuan a tuikhuah zawng zawng sahkang a ngaih tur thu a sawi.
P&E minister chuan a khawl pathum awm zingah pakhat chauh an run thei tawkin am la tlan naw naw tih a sawi a. A siamna turin khawp ringawt pawh Rs vbc 12 vel sen ngai tura chhut a nih thu a sawi a. Ram sum dinhmun enin, duh ang tawka chei tha turin sum dinhmunin a zir lo a, hun leh tha tam tak sen a ngaih dawn bawk avangin a theih ang angin, megawatt tam vak lo run mek tih a sawi.