Mohamed Salah chuan Liverpool-ah contract thar a ziah belh a, a contract ziah tharah hian a hlawh pawh a pung a. Heti hian Egyptian forward hi Premier League huanga hlawh hnem ber dawttu a ni thei ta a ni.
Salah chuan kum 2027 thleng Anfield-a cham zel turin thuthlung a ziak a, kar khat chhunga a hlawh tur chu £4,00,000 lai niin a hma khan kar tin £3,50,000 a hlawh thin.
A hlawh a pun takah chuan Premier League huanga hlawh hnem ber dawttu, Kevin de Bruyne nen an hlawh zat a inang chiah a, pahnihnaah hian an awm dun ta chiah a, season tawpah Belgian playmaker hian City a chhuahsan dawn a, hei vang hian Salah chu pahnihnaah amahin a awm zui bawk ang.
Manchester City striker Erling Haaland chu Premier League player zinga hlawh hnem ber niin kar khatah £5,00,000 zet a hlawh mek a. Salah leh De Bruyne te hnuai chiahah hian kum 2022 atanga Manchester United zawmtu, Casemiro awmin kar khata a hlawh hi £3,50,000 a ni.
Manchester United player tho, Aston Villa-in an hawh mek, Marcus Rashford leh Arsenal-in an hawh mek, Chelsea winger Raheem Sterling te chu a dawttu niin kar khatah £3,25,000 ve ve an hlawh a ni.
An hnuai chiahah hian kar khata £3,00,000 hlawh mek, Bernardo Silva, Bruno Fernandes leh Jack Grealish te an awm a. Arsenal player Kai Havertz chu Top 10 huangah hian a lang pha ve chiah a, Germany player hian kar khatah £2,80,000 a hlawh a ni.