Mizoram volleyball chuan international coach an nei thei hnai a, July thlaa course kal turin mi tirh tuma inbuatsaihin a kal man hi chief minister-in a tumsak dawn.
Mizoram Volleyball Association (MVA) hruaitute hian Thawhlehni khan Chief Minister Lalduhoma chu a pisaah hmuin an harsatna hrang hrangte an thlen a, ani pawhin a theih ang anga lo puih a tum thu a hrilh.
MVA hruaitute hian chief minister hnena an thu thlen zingah hian international volleyball coach an neih theih nana puih an dil tel a. July 26-a Maldives khawpui, Male-a International Volleyball Federation (IVF)-in Coach Level I Course a buatsaih turah chief minister hian mi pakhat kalna senso a lo tumsak nghal a ni.
Male-a course kal tur coach tirh chungchangah hian MVA hruaitute chuan chief minister zarah Mizoten international volleyball coach an neih ngei a beiseiawm ta tih sawiin, chief minister chungah an lawm hle tih an sawi.
Mizoram volleyball hruaitute hian chief minister hnenah hian Aizawlah volleyball khelhna tur indoor stadium hran an la neih loh avanga harsatna an tawhte leh hma sawnna daltu a nih thu pawh an hrilh a, hei pawh hi ngaihtuahsak a tiam.
Chief minister hian volleyball indoor stadium sak chu a ngaih pawimawh thu hrilhin a sak nana sum ngai turte ruahmanna siama sorkara thehlut turin a rawn a. Hemi hnuah a sakna tur sum (fund) awm theih dan ngaihtuahpuiasak a nih ngei theih nan tanlakpui a tum thu a hrilh a ni.
Youth Icon Taitea’n Pro Volleyball League 2025 Handbook tlangzarh dawn
MVA hian tun thla tawpa khelh tan tur, Pro Volleyball League 2025 Hanbook chu Ningani zan hian Hawla Indoor Stadium Conference Hall-ah Lalsangliana, (Taitea) Youth Icon 2024-in a tlangzarh dawn.
MVA chuan Pro Volleyball League Handbook tlangzarh hi a ngai urhsun hle thin a, league khelh chhung zawnga inkhel inkaihhruana leh dan leh hraite ziahna a nih avangin urhsun takin a lo tlangzarh tawh thin a, tun hma lamah pawh mi lar leh hruaitu lian tak takten an lo tlangzarh tawh thin.
Pro Volleyball League 2025 hi April 29 atang hian LPS Arena, Falkland Veng, Aizawlah khelh tan a ni dawn a. Kuminah hian mipa team ruk leh hmeichhe team thum an inel dawn a ni.