Nikum nipui bazarah Liverpool thawm a reh hle a, Federico Chiesa chiah an la lut a; mahse, Reds hi Premier League nomawi an la tho va. Kumin bazarah erawh Arne Slot-a team hi an chet danah an che na dawn riauin a lang.
Liverpool hian Netherlands international Jeremie Frimpong chu Bayer Leverkusen atangin £ maktaduai 29.5-in an la fel tawh a, a khelhpui, Florian Wirtz pawh club record thar siamin £ maktaduai 109-a lak luh an tum mek bawk. Hei mai a ni lo va, Bournemouth left-back Milos Kerkez chu £ maktaduai 45-50 vela lak tumin an dawr mek bawk.
Slot-a hian nikum nipuiah khan Chiesa bakah Valencia goalkeeper Giorgi Mamardashvili chu an lei ngei a; mahse, ani hi Spanish club-ah tun nipui thleng hun a hmang zui.
Wirtz leh Kerkez hi Liverpool-in an la a nih chuan £ maktaduai 180 an seng tling der dawn tihna a ni a, kuminah hian Club World Cup-a chhawr hman tur player an duh avangin hun an nei tlem.
Liverpool hian full-back Trent Alexander-Arnold an chhuah tawh a, a aiah ding lam khawiah pawh khel thei, Frimpong an la lut tawh.
Wirtz-a hi Slot-a duh niin Liverpool hian an club-record thar siamah lak lial tumin an dawr.
A tirah chuan Manchester City pawhin Germany international hi Kevin de Bruyne thlaktu atan an it a; mahse, Pep Guardiola team hian man a san em avangin an en kân leh rih tawh a, Liverpool hian an chan ngei hmel.
Left-back pawh Slot-a’n lak a duh zingah telin Kerkez an thlithlai a. Liverpool leh Bournemouth inkarah inremna la awm lo mah se an lak theih ngei hmel bawk.
Slot-a hian hmatawng tihchak a duh avangin Luis Diaz leh Darwin Nunez te chu an chhuah hmel.
Diaz hian kum 2022-ah Reds zawmin Slot-a hnuaiah a khel chhe lem lo va, season hmasa khan goal 17 a thun a, heng zinga 13 hi Premier League-ah a ni.
Hetih rual hian nipuiah hian Barcelona emaw, Saudi Arabia emaw a pan rin a ni a. A bialnu nen social media-ah Liverpool tantute mangthana pawh an dah chhuak tawh.
Nunez hi Slot-a hnuaia a khelh tam loh bakah sawisel a hlawh nasa a. Benfica atanga season thum liam taa £ maktaduai 85-a Liverpool a zawm hnuah a thahnemngaihnain fak hlawh mah se goal a thun tluang thei lo chu mi tam tak sawiselna a ni.
Hma hun chiang lo zingah Harvey Elliott pawh a tel a. Midfielder hian season liam taah Premier League-ah vawi 18 inlan mah se vawi hnih chauh bul a tan pha.
Goalkeeper Caoimhin Kelleher chuan Reds chhuahsanin Brentford a zawm fel tawh bawk.