LBS Suzuki-in fur laia an mamawh em em thelretkawr 310 an pek avangin Aizawl Traffic Police an lawm hle a, a taka an hnathawh hriatpuitu an nih thu sawiin an ngaihlu hle.
Nimin tlaiah LBS Suzuki showroom, Bawngkawnah Dealer Principal H Ngurdingliana chuan Traffic Senior Superintendent of Police, Ruatsanga Ralte kutah thelretkawr a hlan a, an sumdawnna kawnga hlawkna an hmuh atanga vantlang tana an mawhphurhna hlen chhuahna a nih thu sawiin, raincoat 310 lei nan hian Corporate Social Responsibility (CSR) atangin cheng nuai nga vel an hmang a ni.
India ram pum traffic system hrang hrang zinga fak hlawh Mizoram khawpui Aizawla lirthei tlan dan thununtute tan malsawmna ropui tak a nih thu Ruatsanga chuan a sawi a, LBS Suzuki-in a takin traffic hnathawh an hriatpui tih sawiin, furpui a lo thlen changa an harsatna phuhrutu leh an mamawh em em a ni a, tunah chuan a kawlpui khenthlakin a awm a, an lawm tak zet a ni tih a sawi.
LBS Suzuki hian a hmain Mizoram Police hnenah Suzuki Gixxer 250cc motorcycle, pakhat cheng nuai hnih chuang man, panga an lo pe tawh bawk a, heng zinga pathum hi Traffic-in an hmang a ni.
Ngurdinga chuan Aizawl Traffic mamawh an pek theih avangin an lawm hle tih a sawi rualin an theih ang tawka puih zel an duh a, an sumdawnna atangin company-in Mizo sum thahnem tak a rut a, CSR leh sponsorship atan a tam thei ang ber hnuh let tumin hma an la a, Mizoram tana an tangkai vena nia an hriat thu a sawi.