Nimin piah maiah state-a rorel lai ZPM party chuan an party president Lalliansawta chu a taksa lam chak lohna avanga a nihna chelh rih thei lova ngaiin, an party leader, chief minister ni bawk Lalduhoma’n an party a kaihhruai rih tur thu an sawi a, niminah an party vice president (elected) W. Chhuanawma’n a taksa lama harsatna a tawh avanga chawlh a dilna hriatzui a ni leh ta.
An party hotu lawk hetianga an chawlh rih tur thu a rual deuh thaw a hriat a ni ta mai hian eng nge nghawng a neih dawn a hriat loh a, an party chhungah buaina ril deuh an nei nge, thil awmsa an rawn tarlang thar ve mai mai tih lah hriat a ni lem lo.
An pawl dan bu ang chuan nakkum(2027) mai hi an party inthlan hun a ni a, hun rei a ni tawh lo chunga an hotu lawk pahnih, elected ve ve lehnghalin an han chawlhsan dun thut mai hi an party chhung buai ruk vang emaw ni chu aw a tih theih bawk.
Mahse, hrisel lohna leh bawrhsawmna avanga hetianga an tawng hi a pawi a, state a roreltu an nih avangin mipuiin ngaihdan leh rindan hrang hrang an nei zui ngei dawn tih pawh an hre lawk ngei ang. Tin, eptu party lam pawhin thu vu vu han sawi vel pawh nuam an ti zui viauin a rinawm bawk.
Anmahni lam hian thil thui tak an thlirlawk ve tho ngei ang a, an mi leh sate mai ni lo, state a roreltu an nihna zawnah an party kalphung felfai deuha an la rawn sawichhuah ngei pawh i beisei teh ang u. Hetih lai hian an kal tum leh dan deuh hi chu an danbu kalh deuhte pawh a awm lek lekin a lang deuhin a hriat!