2030 Commonwealth Games thleng tura chanvo an neih hnu leh 2036 Olympics thleng tura diltu an nih hnuah India chuan 2038 Asian Games pawh thlen an inhuam thu an sawi leh ta.
Indian Olympic Association (IOA) chuan Asiad thlen an inhuam thu hi Olympic Council of Asia (OCA) hnenah lehkha ziakin an thawn.
An thu thlen hi Ninganiah khan China-a OCA governing body thutkhawmnaah pawh sawiho a ni nghe nghe a, an dilna hi enfiah turin OCA palai rualten India an tlawh zui dawn a ni.
“India-a Asian Games nghah hi kan duh hle a. OCA nen pawh inbepawpin kan inhuam thu lehkha pawh kan thawn tawh a, kan indawr chhunzawm zel ang,” tiin IOA CEO Raghuram Iyer-a chuan a sawi.
Asian Games tum thum lo awm leh zel turte innghahna tur hmun chu tihfel sa a ni tawh a. Kum 2026-ah hian Aichi-Nagoya (Japan)-ah neih a ni ang a, a dawt leh, kum 2030-ah Doha (Qatar) leh 2034-ah Riyadh (Saudi Arabia) ten an thleng thung ang.
India hian kum 1982 khan Asian Games hi a lo thleng tawh a, hei bak hi an thlen chhunzawm leh tawh rih lo a ni.
Asia khawmualpuia infiamna kûtpui lian ber an neih hmasak ber, kum 1951 pawh khan India hian an lo thleng tawh bawk a, heng tum hnih an thlenah hian New Delhi khawpuiah an nghat ve ve a ni.
Tun tumah erawh chuan 2030 Commonwealth Games leh 2036 Olympics thleng thei tura infiamna hmunhma hrang hrang an buatsaih mekte leh tha taka ruahmanna an neih sa avangin Asiad an thleng a nih chuan Gujarat-a Ahmedabad khawpui chu an nghahna hmun atana rawt a ni ta thung a ni.
“Kum thum atanga kum li chhungin Ahmedabad hian infiamna hmun peih sa tam tak a nei hman dawn a. Heng hmunte hi uluk taka infiamna lama phurna chawisang tura sak an ni a. India-in 2036 Olympics a thleng a nih ngat chuan heng hmunhma tam zawkte hi hman nawn theih a ni dawn a, hei vang hian Asian Games chu a chhunzawmna ropui tak a ni ngei ang,” tiin thuneitu pakhat chuan a sawi a ni.