Aizawl: Central YMA hnuaia ruihhlo do tura din, Central Anti Drugs Squad (CADS) 2nd Batch, 2026 puipa leh member turte Thawhtanni chawhnu dar 3 khan lakluhna hun hman a ni.
Tuikhuahtlanga Central YMA Hall-a lak luhna inkhawm hi Central YMA Vice President Prof. Lalnuntluanga’n a kaihruai a. Lalhmuchhuaka CEC in hunserh a hmang. Prof. Malsawmliana, Gen. Secretary-in CADS memberte inhmelhhriatna hun a hmang.
Inkhawmah hian Central YMA President R. Lalngheta chuan thusawiin, CADS memberte ruihhlo do kawngah fimkhur a tul a, thlemna a nasa a, rilru fim tak leh puitling taka an chet a ngai a. Tihsual palh a awm pawhin ngaihdam dil hreh loh tur a ni a. Taimak chhuah leh teirei peih a tul a, tlawmngaihna nen ruihhlo an do a tul a. Inlungrualna leh thawhhona tha a pawimawh tiin CADS memberte a chah.
CADS 2nd Batch, 2026-ah hian CADS puipa (Office Bearers) atan Convener: S.F David Ngursangzuala, Asst. Secretary, Central YMA; Asst. Convener: R.L. Zomawia, CEC leh R. Lalchhandama, CEC; Secretary: Darremsanga Renthlei, CEC leh Asst. Secretary: Anthony Lalhriatpuia, CEC te ruat an ni a. Anni bakah hian member 18 an awm a ni.
Central YMA, Kumpuan Sub-Committee member-te chu a hranpaa CADS member-a ruat ngai lo vin, tel sa vek tura ngaih an ni a. CADS member thar ruatte hian tlawmngaihna rilru nen an mawhphurhna hlenchhuak ngei turin Central YMA chuan a beisei a ni.
CADS 2nd Batch, 2026 term hi April 27, 2026 atanga July 26, 2026 thleng a ni ang