Tun hnaiah Mizo entertainment huanga kan hriat lar ni thin te, kan hriat lar mek te zingah politics luhchilh hi an awm leh zauh thin. Tun tumah pawh hetiang chanchin hriat tur a awm thar e.
Mizo hmeichhe hlang awmna band kan hriat thin, member paruk awmna, The Chosen guitarist, Sentei tia an koh, a hming pum Dr Lallawmkimi Tochhawng pawh tun tum Aizawl Municipal Corporation (AMC) inthlanah Electric Veng, Chanmari leh Zarkawt-te awmna Ward V-ah ZPM party candidate niin, thlan tlin a ni.
Aizawl khawpui enkawltu Corporator ni tur hian Dr Sentei hian vote 3,306 hmuhin hnehna a chang a. Amah hnaih bertu MNF candidate Abishag Vantluangpuii Ralte-in vote 1,666 a hmu a, an inthlauhna hi vote 1,640 a ni.
Kum 2009-a indin, Dr Sentei telna gospel band The Chosen hian an hun laiin hla eng emaw zat an tichhuak hman a. Chung zingah chuan ‘Kan fak a che’ tihte, ‘Broken wings’ tihte, ‘All these years’ tihte an lo tichhuak tawh a. He’ng an hlaah te hian Dr. Sentei hian a thawhhlawk hle a, an hlaah te hian a guitar solo leh a tum dan danglam bikte hriat tur a awm thin.
Dr. Sentei hi Electric venga awm a ni a. A pa hi footballer hranghlui fam ta, Pa Dinga tia hriat lar thin Laldingngheta Tochhawng kha a ni.