Shakira show neihna tura inbuatsaih mek Brazil-ah construction worker pakhat chu chesualin a boral phah a, he thil hi April 26, Pathiannia thleng kha a ni.
Shakira ‘Todo Mundo No Rio’ concert neih turah hian inbuatsaihna ngawrh taka kalpui chhoh mek a ni a, event buatsaihtute pawhin theihtawp chhuaha hma an lak mek laiin he thil duhawm lo tak hi an chungah a thleng ta tih an sawi.
Concert neihna hmun tur hi a ruhrel lian leh him tawk taka siam tum niin, hemi atan hian hma an la mek a, an hnathawk pahat chu a chungsang lam atanga tla thlain, emergency team lam koh nghal an ni a, damdawi in an thlen meuh chuan chhan hman a ni ta lo a ni.
He concert-na hmun tura ruahman hi tuipui kam a ni a, mipui pawh hip tam hle tura ngaih niin, a buatsaihtu lam pawh an inbuatsaih ngawrh chho hle a, he chhiatna thleng avang hian a hmunhma uluk leh him zawka din ngei an tum thu an sawi thar.
Zaithiam Shakira pawhin vanduaina thlen thu a hriat veleh hian pawi a tih thu leh a chhungte leh event buatsaihtute a tawrhpui thu a sawi bawk.