Aizawl: MNF President Zoramthanga chuan AMC inthlanpui neih zawh takah an party chuan sorkarna siam zo lo mah se, Aizawl khawpui leh Mizoram hmasawn zelna turin theihtawp chhuaha ke pen zel an tum tih a sawi.
Zoramthanga chuan AMC inthlanpui neih zawh taka AMC Corporator atana thlan tlin thar zawng zawngte, a bikin tum thumna atana a zawna thlan tlin, MNF candidate B Lalawmpuii te a lawmpui thu sawiin, duhsakna a hlan a. An candidate-te duhsak taka lo vote-tu zawng zawngte chungah lawmthu a sawi a. AMC sorkar thar siam tur ZPM a lawmpuiin, Aizawl hmangaihna nen khawpui hmasawnna tura theihtawp chhuah zui zel tur leh tha taka AMC enkawl chhunzawm turin duhsakna a hlan nghal.
Tun tuma an candidate mi tha tak tak tling zo rihlo te pawh Aizawl leh Mizoram hmasawn zelna tur hian tha thlah lova theihtawp chhuaha bei zel turin ngenin, “Kan ram leh hnam hian inthiamna leh theihna, in inhlanna thuk zawk hi a la mamawh dawn chauh a ni tih hre reng turin ka chah bawk a che u,” a ti,
AMC inthlanpui 2026-ah MNF in sorkarna siam zo lo mah se, Aizawl khawpui leh Mizoram hmasawn zelna tur hian MNF chuan theihtawp chhuaha ke pen zel an tum tih sawiin, “Kan ram leh hnam hmasawn zel nan kan theihna a tawp hma loh zawng theihtawp kan chhuah chhunzawm zel dawn a ni,” Zoramthanga’n a ti.
MNF President chuan, “MNF chu AMC dintu leh bul tantu, term hnih chhung AMC lo enkawltu kan nih bakah hmasawnna pawh kawng hrang hranga thlentu kan ni a. AMC enkawlnaah kan theihtawp kan chhuah a ni tih hi Aizawl mipuite pawhin min hriatpui kan ring. Chutih rualin, AMC kan enkawlna kawnga mipui mit kan tlun tawk lohnaah te, inthlanna kan neih chhunga mite thinlung hliam palh kan neih chuan ngaihdam ka dil nghal bawk e,” a ti bawk.