Aizawl: April thla hi Autism Acceptance Month a ni a. Hemi pual hian Thawhlehni khan Autistic Community, Mizoram huaihawtin Gilead Special School, Bawngkawn Brigade-ah hun hman a ni.
He hun hi Lalbiakfela President, Autistic Community Mizoram chuan a kaihruai a, Dr. Andrew MS Zuala Secretary hnen atangin report ngaihthlak a ni a. Autistic nu leh pa atangin leh Gilead Special School-a Autism enkawltu leh zirtirtu H. Lalbiakdiki te’n thu an sawi bakah, Gilead Special School-a kal Autism naupangten special item an nei bawk.
He hunah hian Autism nu leh paten an harsatna tawh hrang hrangte sawiin, mipuiten hetiang naupang harsatna bik neite an la hmelhriat tawk loh thu leh an harsatna tawh hrang hrangte sawi a. Tunlaiah Autism naupang an pun zel thu leh hetianga harsatna bik nei naupangte hian tanpui an mamawhzia leh mipuiten an hriatthiam a, an pawm thiam a tulzia sawi a ni.
Autistic Community, Mizoram hi kum 2025 khan din a ni a, naupang harsatna bik nei Autism nu leh pa Mizoram hmun hrang hranga awm inzawmkhawm ten an din a ni a, tunah hian member 216 vel bawr an awm mek a ni.