Aizawl Municipal Corporation (AMC) inthlan neih zawh taka hneh taka chaka sorkarna siamtu, ZPM party chuan Thawhlehni khan AMC General Election 2026 Hnehna Lawmna, Vaivakawn Auditorium-ah hun an hmang.

Inkhawm hi ZPM General Headqurters President charge la mektu, Chief Minister Lalduhoma’n a kaihruai a. Thu sawiin, AMC inthlana an chakna chu mipui hnehna hi beiseina vang a ni a, chu chu a tha zawk beiseina a ni a. Mipuiten duh loh an nei a, duh an nei a, an duhthlanna chu vote hmangin an tilang ta a. Miin an enna tur leh an tehna tur pawh an hnathawh danah a nih dawn avangin an auhla leh an manifesto anga hna thawh hi an mission pawimawh ber a nih thu a sawi.

UD&PA Minister K Sapdanga pawhin thu sawiin ZPM chu thawhrimna hmachhuantu an ni tih sawiin, “Kan candidate-te an thawkrim a, kan MLA-te an tang em em bawk. Pathian malsawm tlakin kan thawkrim ve ni hian ka hria a, thawhrimna kaltlanga Pathian leh mipuite malsawmna kan chan hi kan chapopui a thiang ve lo. Chuvangin, kan tawngkam te, kan thusawi te, kan thil tihah te kan fimkhur deuh deuh a ngai a ni,” a ti.

AMC inthlan hian Aizawl mipuiin ZPM chunga rinna an nghahzia a tilang tih sawiin K Sapdanga chuan, “He chakna hi ZPM ta mai ni lovin, mipui ta a ni. Min duhsakna leh rinngamnaah kan lawm em em a. Aizawl mipui chungah lawmthu kan sawi a ni,” a ti.

Mipuiin an chunga rinna an nghah avang hian mipui rinna tihthlawn a thiang ve lo tih sawiin UD&PA minister chuan, “Kan thiam bik, thei bik, remhre bik lo a nih pawhin, kan thawkrim bik tal tur a ni ang. Kan hotupa, kan CM zahawm takin a sawi fo thin. Sorkar tha zawk siam kan tum a, chumi tur chuan kan theih anga nasain hna kan thawk a. Chuvangin, tha bik nih hi i zahpui lo ang u,” tiin, that bik pawh an tum tlat reng tur tih a sawi.

K Sapdanga chuan tunah chuan AMC leh sorkar inhne rem takin an kal thei dawn ta a. AMC tha zawk, mipui tana harsatna siamtu ni lo, Aizawl mipui tana awlsamna leh remchang tha zawk siamtu nih ngei an tum dawn tih a sawi a. UD&PA changtu an nih angin, AMC nen thawhhona tha, tum mumal leh kalphung mumal an din ho theia a rin thu a sawi bawk.

Aizawl mayor tur H. Lalremtluanga

ZPM Party-in AMC Election 2026-a hnehna an chan an lawmnaah hian UD&PA Minister K. Sapdanga chuan AMC hotu turte puangin Ward VI atanga thlan tlin, H. Lalremtluanga chu Aizawl mayor tur atan a puang.

Mayor atana H. Lalremtluanga a puan bakah, deputy mayor atan Ward XVI atanga thlan tlin, R. Lalawmpuii ruat a ni a. Executive Corporator atan Christina Roluahpuii Sailo (Ward VIII), Vanlalhruaia (Ward XIII), Vanlalfaka (Ward III) leh K. Lalrodinga (Ward XVIII) ruat a nih thu a puang bawk.

Aizawl mayor tur, H. Lalremtluanga, kum 43, hi a pa chu H. Biakchhunga niin, a nu chu Biakchungnungi a ni. Diana Zosangpuii Sailo d/o Dr. Lalsawmliana Sailo, Zotlang nen inneiin fa pali – mipa pathum leh hmeichhia pakhat an nei a, Chanmari West-ah an cheng a. Chanmari West Hmar Veng Presbyterian Kohhran Upa a ni.