Police ten an hna tha tak leh khauh lehzuala an thawh theihna tur atana duan, ‘Year of Discipline’ chu Nilaini khan Home Minister K. Sapdanga’n a hawng a. Police tan chuan inthlahdahna hi an hmelma lian ber a nih thu sawiin, police tha chu hun ralmuangah inthununna tha nen a inbuatsaih reng a tul tih a sawi.
Arya Mess Police Headquarters, Khatla-a hawnna inkhawmah khuallian, K. Sapdanga chuan hetiang hun an hman theihna tura DGP leh a thawhpui officer zawng zawngte inpekna leh Mizoram Police hmasawnna tura an tih tak takzia a hmu chu lawmawm a tih thu a sawi a. Police tan discipline hi duhthlanna a ni lo va, an innghahna lungphum a ni a, chu lungphum chelh dingtu chu rinna a ni tih a sawi.
Home minister chuan discipline piah lamah mipuiten police-te chungah rinna an nghah ngam a tul a, mipui rinna hi amaha lo awm ni lovin ni tin hlawhchhuah ngai tih a sawi a. Mizoram a ralmuan vanga inthlahdah mai tur an ni lo tih sawiin, “Hun ralmuanga kan inthlahdah chuan harsatna a lo thlenin kan talbuai ang. Police tha chu hun ralmuangah inthununna tha nen a inbuatsaih reng a tul,” a ti.
K Sapdanga chuan police-te chu an uniform hi thuneihna kengtu a ni ngawt lo va, mipui chunga thuneitu an nih loh thu sawiin, mawhphurhna leh zahawmna kengtu an ni a, mipuite ralmuang taka an awm theihna tura an rawngbawl saktu kan ni tih hre reng turin a chah a. Outpost kilkhawr ber atanga Aizawl khawpui lun lai ber thlengin police-te inthununna leh invawnna chu a lang tur a ni tiin, Year of Discipline chu mipuiin Mizoram Police chunga rinna an nghah ngam lehzualna tur rahbi pawimawh tak ni tura a rin ngheh tlat thu sawiin, thu maia an inhampuarna ni lo se a duh thu a sawi.
He hunah hian police officer lian te — IGP, DIG, AIG, SP leh Commandant zawng zawng, Principal Police Training School leh Aizawl-a police officer lian hrang hrangte bakah home department-a official lian leh sawm bik mi thahnem tak an tel a ni.