Aizawl: Ephraim Higher Secondary School (EHSS) atanga HSLC leh HSSLC 2026 Exam-a hlawhtlingte lawmpuina hun hman a ni a. He hunah hian LESDE Minister Lalnghinglova Hmar chu khuallian niin a hman pui.
Minister Lalnghinglova Hmar chuan zirlaite fuihin, khawi hmunah pawh kal se Mizo nun ze mawi, aia upa zahna leh inzahtawnna vawng nung reng turin a chah a. Tunlai khawvel changkangah thalaite an vanneih rualin, technology leh social media-te an nuna harsatna thlentu ni lova hmanraw tangkaia hmang thiam turin a fuih bawk.
Minister chuan zirlaite chu mahni inthununna nei a, hriselna ngaihpawimawh tur te, pawl 12 chhuak tharte chu college an luh hunah an zirna ngaihpawimawh leh chhungkaw dinhmun hre renga khawsak thiam turin a fuih a. Mizoram Fertility Rate (1.87) chu India ram (2.1) aiin a hniam zawk a, India ram mipui zawng zawng za zela 0.09 chauh an nih avangin hnam dinhmun atan pianpun kawngah rilru thar put a tul thu a sawi bawk.
Ephraim Higher Secondary School hian kumin HSLC-ah zirlai 163 an exam a, 163 ten hlawhtlinna changin pass percentage 100% an nei a, English subject topper Joanna Lalzuimawii an nei bawk. HSSLC Arts stream-ah hian zirlai 99 an exam a, pass percentage 100% an nei a ni.