All India Organisation of Chemists & Druggists (AIOCD) ten Nilainia All India Strike neia India rama damdawi dawr zawng zawng khar tura ruahmanna a siam chu Mizoram Chemists & Druggists Association (MCDA) pawhin an zawm dawn tih sawiin, damdawi dawr zawng zawng an khar dawn tih an sawi a. Dan leh hrai awm mumal lo chunga online hmanga damdawi zawrh chu mipui him nan a thil pawi thei a nih thu an sawi bawk.
MCDA chuan Thawhlehni khan Aizawl Press Club-ah thu thar thehdarhtute kawmin, dan lova online-a damdawi hralh chu mipuite tan a him loh avangin lungawi lohna lantir nan dawr hi khar a ni dawn tih an sawi a. Online-a damdawi zawrh leh hralh hi Drugs & Cosmetics Act, 1940 leh Rules 1945 hnuaiah kalh a ni tih an sawi.
India ram puma strike an huaihawt chhan chu kum 2018 atanga kalpui phal online pharmacy-ah hian dan mumal awm loh vang a nih thu sawiin MCDA hotute chuan online-a damdawi zawrhte hi company tha siam ni lo va, a ang chiaha siam damdawi a tam em em a, heng zingah hian a nih tur ang ni lo hmuhchhuah pawh a awm fo tih an sawi.
Pharmacist tel lova damdawi dawr hawn pawh phal a nih tawh lo laia tunge an ni tih pawh hriat lohte damdawi zawrh lei ringawt hi a him lo va, a zuartute hi hmelhriat pawh ni mah se, a rawn thawntute hi tute nge an ni tih hriat a ni tawh lo va, Mizoramah a endikna mumal a awm loh avangin thil pawi tak a thlen thei tih an sawi bawk.
MCDA hruaitute chuan online pharmarcy hi hetianga dan mumal lova a kal reng chuan damdawi ruihhlo chi hrang hrang hi chah theihin a awm hun a la awm a, hetiang hi a thleng a nih chu tuna sorkar leh YMA-ten an buaipui em em ruihna atana hman damdawite hi thunun zawh rual a ni dawn loh thu an sawi.
MCDA chuan strike chhung hian hospital huam chhunga canteen awmte chu dawr khar tur hian a huam tel loh thu an sawi a, strike neih avanga buai loh nan mamawh tur damdawite lo lei lawk turin mipui an ngen.
Pharmacist-ten damdawi dawr an thutchilh kher a ngai chu an tana harsatna thlentu a nih thu an sawi a, Mizoramah pharmacist zir chhuak an la tam loh avangin indaih lohna a nasat thu leh state dangah pawh an tih loh laia Mizorama tih a ngai chu damdawi zuartute tichi-aitu a nih thu an sawi bawk.
Hetih lai hian Mizoram Food & Drugs Association hruaitute pawhin thuchhuah siamin mipuite chu chiai lo turin an chah a, damdawi dawrte chu khar ni mah se sorkar leh private hospital-a damdawi zawrhnate chu hawn a nih dawn tho avangin manganna tur a awm loh thu an sawi a. Natna benvawn neiten an damdawi mamawh lei lawk tur leh rikrum thila mamawh theihte chu lei lawk turin mipuite an chah bawk.